House-ah Lalduhoma'n ngaihdam a dil

Nimina Assembly session-ah opposition group leader leh ZPM member Lalduhoma chuan Sports minister Robert Romawia Royte, Assembly Speaker, House member leh Zoram mipui hnenah ngaihdam a dil.

Tarlan tawh angin, February 21, Thawhlehnia Assembly session-ah SYS minister Robert Romawia leh ZPM member Lalduhoma te chu an inhnial a; Assembly speaker Lalrinliana Sailo chuan, "He House hi a zahawm a, mipui pawh an zahawm. Thu dik lo sawi kan en ang. Thu inchuh lai tak, tu nge dik lo zawk kan en ang," tiin a chalrem a ni.

Lalduhoma hian, Mizo hmei­chhe footballer pakhat chu Mizo­ram tana a feh chhuahnaah a inhliam a, a inzaina senso Mizoram sorkarin a tumsak vek thu Robert Romawia'n a sawi niin a sawi a; Robert Romawia chu hmeichhe footballer chungchang a sawi loh thuin a ṭang thung.

Nimina Assembly session-ah speaker Lalrinliana chuan house proceedings-a a lan dan leh Assembly officer-te'n an en chian­na aṭangin Robert Romawia'n thu dik a sawi zawk thu a puang a ni.

Lalduhoma chuan, Miriam Lalnunsiami damlo a inkhul chhuah dawna a buaizia leh a ṭhian­te'n an khul chhuah thu House-ah a sawi chhuak tih sawiin, "Zan lamah social media-ah inhnial­na a chawk chuak a, an inhnial nasa hle. Social media-a thu léng vel leh House chhunga kan thusawi ka ngaih fin pek a, pawi ka ti khawp mai," a ti.

Hre reng chunga ti lui a ni loh thu sawiin Lalduhoma chuan, "Ka hriat sual palh liau liau a nih avangin kan minister zahawm tak ngaihdam ka dil a ni," a ti a; Assembly Speaker, House member-te leh mipui lakah pawh ngaihdam a dil nghal thu a sawi.

Lalduhoma chuan, February 21, 2023-ah Sports Minister-in Miriami nen an inbiak loh thu uar taka a sawi thu tarlangin, "Social media lamah an inbiakzia a lang leh si. A ṭawng sual palh niin a lang a, a hriat sual palhah ngai ila, ngaidam ve tho ang u," a ti bawk.