OSD to CM tan cheng nuai 22.68 séng; A bàn chhan mimal leh chhungkaw thil - CM

General Adminis-tration changtu chief minister Zoramthanga chuan ZPM member Vanlalhlan leh INC member C Ngunlian­chunga zawhna ziaka chhángin, OSD to Chief Minister tan sorkarin cheng nuai 22.68 a sên thu a tarlang.

OSD to CM a bàn tawh leh tawh loh leh, a bàn chhan zawhna chhangin Chief Minister chuan, "Aw, báng tawh e. A bànna chhan hi mimal leh chhungkaw thil vang a ni," a ti.

Zoramthanga chuan, OSD to CM chuan a bàn hmain sorkar lai­pui aṭangin sawi chhuah a neih loh thu a tar­lan rualin, "Sorkar thil pawimawhah CM, MP leh minister-te'n cen­tral sorkar hotute leh official-te dàwrnaah a ṭawiawm ṭhin bakah, ministry hrang hranga DPR thehluhte a bawhzui ṭhin," a ti a; sorkar thilah Mizoram páwnah vawi 12 a zin thu a sawi.

Chief Minister tarlan danin, Mizoram sorkarin OSD to CM tana sum a sênnate chu TA/DA, MR bill, office enkawlna (co-terminus staff-te hlawh) leh lirthei hman man a ni a; Delhi-ah ṭum 12 a zin a, a zinna senso chu cheng nuai 4.66 a ni.