KHAWTHLIR
JTC-in thisen pe
J Thankima College NSS chuan nimin khan Civil Hospital, Aizawl Blood Bank tan an college hall-ah thisen unit 43 an pe a, petute mipa 33 leh hmeichhia 10 an ni.
E-way bill siam lo
Taxation minister Lalchamliana chuan ZPM member Dr Vanlalthlana zawhna ziaka chhángin, kum 2019 aṭangin Champhai district leh Kolasib district inkarah kuhva hralhna atan way bill siam a awm loh thu a tarlang.
Thuthlung ziak
Mizoram University-a Department of Food Technology leh Hnahlan Grape Farming & Processing Cooperative Society chuan nimin khan thawhhona thutlung an ziak. Thuthlungah hian MZU registrar Prof. Lalnundanga leh Hnahlan GFPCS Chairman-in hming an ziak a; thuthlung hnuaiah hian grape chìn leh sâwngbâwl danah changtlung zawkin hma an laho dawn a ni.
Grade B++ pe
India rama university leh college hmasawnna endiktu National Assessment and Accreditation Council (NAAC) chuan Govt. Aizawl West College an endikna result an ti chhuak a, Grade B++ (CGPA 2.81) an pe. A hmaa assessment-ah B+ an lo pe tawh a, hma an sawn leh hret a ni.
Heroin man
Champhai police-te chuan February 20, 2023 khan heroin gram 12 leh a neitua puh K Lalthanpuia (33) s/o K Hnehthangdula (L), Armed Veng South an man.
Minister-in endik
Minister of state Robert Romawia Royte chuan nimin zing khan a bial chhung, Armed Venga Vengnuam huam chhunga kawng siam mek leh check dam siam tura hmalakte a endik a; "Hnathawh a nih theih hunah he lai hnai aṭangin inhlawh duh an awm a nih chuan kan duhsak ang," a ti. Check dam siamna atan cheng nuai 300 a awm tawh niin sorkar thuchhuahin a tarlang.