IT Skill Development & Training Centre ICT dept.-in hmun pasarihah din a tum

Information Communication & Technology (ICT) minister Robert Romawia Royte chuan MNF member C Lalmuanpuia zawhna chhángin, hmun pasarihah IT Skill Development & Training Centre din tum a nih thu House a hrilh.

ICT Minister sawi danin, RD block pasarih - Chawngte, Lawngtlai, Bungtlang South, Zawlnuam, West Phaileng, Lungsen leh West Bunghmunahte IT Skill Development & Training Centre din tum a ni.

Robert Romawia chuan, training centre-ah hian computer set kim 50 ṭheuh dah tum a nih thu a sawi a, "Zirtirtu leh zirlaite'n information technology (IT) zirnaa hmasawnna an neih lehzual theihna atan ṭangkai taka hman theih beisei a ni," a ti.

ICT Minister sawi danin, project hi NIELIT nen ṭang duna hmalakna tur a ni a, NIELIT-in course tam tak an pe dawn a ni. Block chhunga mipuiin nasa takin IT lamah an chhawr ṭangkai thei tura ngaih a ni. NIELIT hian zirtirtu an tum dawn bakah running cost an tum ang.

ZPM member C Lalsawivunga zawhna chhangin Robert Romawia chuan, kum 2021-22 leh 2022-23 chhungin ICT department-in state budget pangngai aṭang ni lo, central sorkar aṭangin hmasawnna hna thawhna tur cheng nuai 7,250 a hmuh thu a sawi a, "State budget páwn aṭanga hmuh ni mah se, Finance department kaltlanga thawh tur a nih avangin state budget-ah khung luh a ni," a ti.