Lawngtlai district-ah Bangladesh aṭanga ráltlân mi 541 an awm mek

Lawngtlai bawrhsap David Lalthan-tluanga hoin nimin khan sahimna zawnga Bangladesh aṭanga Lawngtlai district-a lutte chungchang sawiho a ni a; Lawngtlai district-ah Bangladesh ráltlân mi 541 an awm mek thu tarlan a ni.

Ṭhutkhawmah hian district hotu te, Police, Border Security Force (BSF) leh Assam Rifles hotute an tel a; ráltlânte himna, ramri venhim, district mipui himna leh rálmuanna lama hmalak dan tur sawiho a ni.

Bawrhsap chuan, ramri kâna chêtna leh khawsakna chungchangah sahimna zawnga tlân lutte'n harsatna an tawh lohna tur leh dan bawhchhiatna leh ram chhung himna tichhe thei thil thleng a awm loh nan sorkar hotu te, police leh ramri vengtu sipaite inkarah inbiakpawhna leh thawhhona ṭha a awm a pawimawh thu a sawi.

BSF hotute chuan, Parva-III mipui rîkrâp zawnga chea puh an nihna chu an phá a; ramri venhimna leh ram chhung himna atana an tih tur chin chauh an tih thu sawiin, ráltlânte dinhmun hrethiam chungin mipui harsatna siam lo thei ang bera hma an la ṭhin niin an sawi.

BSF hotute thusawi chungchangah hian, thil hriat sual a awm loh nan ramri vengtute leh mipui inkara inhriatpawh tawnna ṭha a awm theih nan hmalak ni se, an ti.

Lawngtlai district thuneitute chuan, khairual zawka ráltlânte chhawmdawl leh enkawl an nih theih nan ṭanpuina pe turte chu Lawngtlai DC kaltlang emaw, an hriatpui emawa pek zel ni se ṭha an tih thu an sawi.