MNF-in Duhoma thu dik lo sawi zahthlak an ti

MNF party chuan, Assembly House-ah opposition group leader Lalduhoma'n thu dik lo a sawi nia sawiin, zahthlak an tih thu leh, thu dik zîktluak lo a sawi ṭhin tih a lan chian thu an tarlang.

MNF thuchhuah chuan, Assembly session neih mekah February 21, Thawhlehni khan National Games-a Mizoram aiawha khel Mizo nula inhliam ṭanpuina pek chungchangah Sports minister Robert Romawia Royte leh Lalduhoma te an inhnialna chungchangah nimin khan thu dik hai lan a ni a, Lalduhoma'n a dik lo zawk tih pawmin ngaihdam a dil thu an tarlang a, "Mizoram rorelna in sang berah thu dik lo a sawi chiang ngei tih hai lan a ni hi MNF chuan zahthlak a ti tak zet," a ti.

Lalduhoma'n Sports department hmalakna chungchangah, PMJVK scheme-ah Sports department-in guidelines kalhin sum hmu ṭeuh ṭeuh angin thu dik lo a sawi nia sawiin MNF chuan, "Thu dik chu PMJVK guideline ang thlapin Mizoram sport leh ṭhalaite tan fund pek a ni," an ti a; Sports department-in UDPA sum pawt pénga hmang anga Assembly House-a a sawi chu thu dik lo a nih thu an tarlang.

MNF chuan, opposition group leader ni mek Lalduhoma chu political propaganda mâwlmang tê tê hmanga mipui bum tum rengah puhin, sim turin an chah a, "Pu Lalduhoma thusawi leh ui bengah hlin tur a awm ngai lo tih hi Zoram mipui hian lo hria se kan duh tak zet a ni," an ti.

Assembly House zahawmna humhim tura speaker Lalrinliana Sailo hmalakna te, Sports minister Robert Romawia'n thu dik a ṭan ngam te, chief minister Zoramthanga, minister-te leh ruling MLA-te Assembly House-a an chêt dante chu an chhuan thu an tarlang bawk.