Mizoramah ṭhelrêt huan siam chhungkaw 3,000 vel an awm

Land Resources, Soil & Water Conser-vation (LRSWC) minister R Lalzirliana chuan nimin khan Chanmari YMA Hall-ah ṭhelrêt chíngtute intawhkhawmna, Rubber Growers' Meet a hmanpui a; department puihnain Mizoramah ṭhelrêt huan siam chhungkaw 3,000 vel an awm thu a sawi.

R Lalzirliana chuan, sorkarin kut hnathawktute hma ngai chung leh ṭhelrêt leh a kaihhnawih thlai dangte hmasawnna chu state economy siamṭha theitu pawimawh a nihzia a hria nia sawiin, "Rubber & Allied Crops Development Board a din a, chumi kal zelah chuan project hrang hrang siamin hmalak nghal a ni a, department ṭanpuinaa ṭhelrêt huan siam chhungkua 3,000 vel an ni," a ti a; department ṭanpuina tel loa ṭhelrêt chíng eng emaw zat an awm bawk thu a sawi.

Ṭhelrêt kung eng emaw zat chu hnài theih a nih tawh avangin department hmalaknain nikum hmasa khan a herna khawl 100 sem a nih thu sawiin Minister chuan, "Zau hrang hranga inhman ṭâwm turin NABARD aṭangin rubber smoke house 50 sakna turin pawisa sem a ni. Khawlte hi ṭangkai taka hman mek a ni a, a theih chin chinah sorkar pawhin hma a la chho zel," a ti.

R Lalzirliana chuan, India ramah ṭhelrêt mamawhna a san thu te, Mizorama ṭhelrêtte chu state danga mi aiin a hnái a ṭhat zawk thu te, tunah hian ṭhelrêt kg. khat Rs 137 a ni thu te, sorkar inrawlh kher loh pawhin a hralhnaah harsatna a awm loh thute a sawi bawk.