Champhai district-a bank-te'n CD ratio target 14.47%-in an khûm

October-December 2022 chhunga Champhai district-a bank hrang hrangte credit deposit (CD) ratio chawhrual chu 74.57% a ni a, 14.47%-in target an khûm.

Nimina Champai DC pisa conference hall-a District Consultative Committee (DCC) ṭhutkhawma tarlan danin, financial year kal mek 2022-23-a third quarter, October-December 2022 chhunga Champhai district-a bank hrang hranga sum dah luh zat aṭanga advances (loan) an pek chhuah inthlauh dan khaikhinna CD ratio chawhrual chu 74.57% a ni a, target 60% an khûm bakah, quarter hmasa July-September 2022 CD ratio 73.98% aṭangin 0.59%-in a pung a ni.

October-December 2022 chhung khan Champhai district-a bank hrang hranga sum dah luh zat chu nuai 46,726.99 a ni a, sum an pek chhuah zat chu nuai 34,842.65 a ni thung.

Financial year kal mekah December 2022 tàwp thlenga Annual Credit Plan (ACP) hnuaia hnathawhte tarlan danin, priority sector-a target 6,884 (cheng nuai 14,511.51) aṭangin 4,849 (cheng nuai 8,073.03) tihhlawhtlin a ni a, chu chu 55.63% a ni.

Non priority sector-a target 159 (cheng nuai 3,300) aṭangin 2,130 (cheng nuai 9,723.41) tihhlawh tlin a ni bawk a, chu chu target aṭangin 294.64% a tling.

October-December 2022 chhungin Pradhan Mantri Mudra Yojana (PMMY) kaltlangin Sishu hnuaiah mi 30, Kishore hnuaiah mi 171, Tarun hnuaiah mi 50, Stand-up India hnuaiah mi pathum, an vaiin mi 254 hnenah loan cheng nuai 1,066.92 pek chhuah a ni.

December 31, 2022 thlengin Champhai district-a Pradhan Mantri Jan Dhan Yojana (PMJDY) hnuaiah mi 21,510, Pradhan Mantri Jeevan Jyoti Bima Yojana (PMJJBY) hnuaiah mi 18,410, Pradhan Mantri Suraksha Bima Yojana (PMSBY) hnuaiah mi 23,370, Atal Pension Yojana (APY) hnuaiah mi 803 an inziak lut tawh.

December 2022 thleng khan Champhai district-ah bank hrang hrang branch 18 a awm a, chu'ngte chu public sector bank leh private sector bank panga ve ve, regional rural bank pasarih leh state cooperative bank pakhat a ni. ATM booth pakua, business correspondent pariat, CSP pakhat leh IPPB hnuaia banking touch point 26 a awm bawk.

Nimina Champhai DCC ṭhutkhawm hi chaikrman James Lalrinchhana, bawrhsapin a kaihruai a, lead district officer Siddharaj, Aizawla RBI manager pawh a tel.