Health Care Scheme chhe mi vangin Damlote an mangang - Congress ṭhalai

Mizoram Pradesh Youth Congress Committee (MPYCC) chuan thuchhuah siamin, Mizoram sorkarin Health Care Scheme chhe mi a duan chhuah avangin damlo damdawi-ina awm ngai leh an chhungte namén loin an mangang niin an tarlang.

MPYCC chuan, Mizoram State Health Care Scheme thar chu mimal damdawi-in leh kohhran damdawi-inte'n tlâkchhiatna thlen theitua an ngaih avang­in an zawm thei lo tih sawiin, "Synod Hospital phei chuan an duh lo satliah mai ni loin, ngun taka Synod Hospital Board-in a rèl, Synod Executive Meeting (SEC)-in a nemngheh thlap a ni a, sorkar Health Care Scheme dan siam hi zawm chi-ah a ngai lo a ni," an ti.

Hmun hrang hrang aṭanga khawpuia damdawi-in pantu an pung zel tih sawiin, MPYCC chuan, "Sorkar damdawi-in kan neihte'n a zo si lo a, loh theih lohin mimal leh kohhran damdawi-in pan a ngai a ni. Sorkar damdawi-inah khum a awm lo tih leh ICU a ruak lo tih vangin private hospital-te pan ngei ngei a ngai a ni," an ti a' chu'ngte avang chuan damlo rethei leh harsate leh an chhungte mang­angin an rûm mek tih an sawi.

Sorkar damdawi-ina khum chang lo, emergency duty doctor-te'n admit ngai nia an ziah, mangang taka damdawi-in dang pantute chu medical re-imbursement/ health care bill phal sak turin MPYCC chuan Mizoram sorkar a phût a ni.

Congress ṭhalaite chuan, Health minister Dr R Lalthangliana chu tuipuirâla a zin hlanin chief minister Zoramthanga'n MNF vice president aṭanga a paih hnuah a sawisa zui nia sawiin, "A awm loh hlana Health department lo suasama tihmualpho a, ar chuk tui loa chhuah hi a tum ta mai em ni tih hi kan zawhna a ni," an ti.

MPYCC chuan MNF sorkar chu - Mizo mipui duh dan kalha CAB/CAA thláwp a, hmasawnna hnathawh lam aia nawmsip bàwlna lama awmze nei loa sum thehthanga hun hmang reng, zu zuar lo tura mipui leh kohhran hmaa chhe­chhama zu zawrh tum leh si-ah an puh a ni.