Health care scheme atan SEDP aṭangin cheng vbc. 140 dah a ni tawh - CM

Planning & Programme Imple­mentation changtu chief minister Zoramthanga chuan INC member Zodintluanga Ralte zawhna chhángin, SEDP aṭangin health care scheme atan cheng vbc. 140 dah a nih tawh thu House a hrilh.

Zodintluanga Ralte hian, 'Chhung tin tana SEDP health care awm anga Assembly House-a Chief Minister-in a sawi chhuah hi a takin mipui tan SEDP health care hi a awm reng em' tiin a zawt a; CM Zoramthanga chuan, "Mizoram sorkar flagship programme SEDP hnuaiah hian health care hi ngaih pawimawh ber zinga mi a ni. Mizoram State Health Care Scheme (MSHCS) kalpui nan SEDP fund aṭangin sum ṭhahnem tak dah a ni," a ti.

Chief Minister sawi danin, SEDP sum aṭangin MSHCS-ah kum 2019-20 khan cheng vbc. 50, kum 2020-21 ah vbc. 10, kum 2021-22 ah vbc. 10, kum 2022-23 ah vbc. 20 dah a ni a, sorkar kum thar tur 2023-24 ah vbc. 50 dah leh a ni bawk.

Zoramthanga chuan MSHCS hnuaiah bill a tam thu sawiin, "Kan rûl hlei thei lo a, a hrehawm khawp mai. Tun financial year-ah ADB loan kan hmuh hman kan beisei a, min rulhsak tur sorkar laipuiin min remtihsak tawh. Buaipui mek a ni a, ADB-a thawktute pawh an phûr. Sorkar laipuiin cheng vbc. 720 min rulhsak dawn a, kan rulh ve tur chu cheng vbc. 280 vel a ni," a ti a; ADB loan leh state sum dah hmangin harsa lutuk loin MSHCS kalpui theih a nih a beisei thu a sawi.

ZPM member Dr Vanlal­thlana zawhna chhangin Zoramthanga chuan, SEDP chu a policy bu leh Planning department-in inkaihhruaina a siam anga kalpui a nih thu a sawi a, "Tunah chhungkaw pakhat kum khat atan Rs 50,000 pek tur a ni a, first instalment pek a ni tawh a, second instalment tur pawh ruahman fel vek a ni tawh a, sem ṭêp a ni. Vawi khatah cheng nuai 3 chu kan sem thei lo a, la chhunzawm zel tur a ni," a ti.