KHAWTHLIR

Akademi Puraskar

Fiamthu thiam B Lalthlengliana (Thangkura) chuan performing arts lamah a thawh hlâwk avangin Sangeet Natak Akademi Award, Akademi Puraskar tia hriat bawk a dawng. Chawimawina hi nimin khan India President Droupadi Murmu-i'n Vigyan Bhavan-ah a hlân a ni. Sangeet Natak Akademi Award hi B Lalthlengliana hma hian KC Runremsangi (folk music, 2017) leh Prof. Laltluangliana Khiangte (playright, 2022) ten an lo dawng tawh bawk.

SEC thukhawm
Synod Executive Committee chu February 21-23, 2023 chhung khan an ṭhukhawm a; Synod moderator Rev. Dr C Chawnghmingliana'n kaihruaiin, agenda 50 an ngaihtuah. An rêl zingah corruption (hlemhlêtna) do leh a kaihhnawih te, ram hruaitute khalh ngil tura Synod-in hma a lak dan tur, land reform leh land ceiling, politics siamṭha tura hmalakna leh Assembly inthlanpui atana ṭawngṭai rual chungchangte a tel.

Wine zawrh phalna
Excise & Narcotics minister Lalrinawma chuan nimina Assembly session-ah MNF member Dr K Pachhunga zawhna chhangin, February 14, 2023 thlengin wine vendor permit/license 43 pek chhuah tawh a nih thu House a hrilh.

Pisa sawn dawn
Treasury Square-a Aizawl District Court-in an chhuahsan tâk in chu Aizawl DC pisa atan luah luh a ni dawn a, vawiin hian Bawrhsap Pisapui hnatlang neih a nih dawn avangin Bawrhsap pisa dàwr theih a ni dawn lo. Aizawl Bawrhsap chuan mipui hriatthiamna a ngen a ni.

YMA-in in saksak
YMA, Keiṭum Branch chuan February 20-23 chhung khan an khuaa khawsak harsa chhungkaw pakhat in tur an saksak a, kawlphetha an pawh luhsak nghal. In sakna atan YMA bakah VC, kohhran, pawl dangte leh mimalin pawisa leh hmanrua an thawh a ni.

Kawngpui thawm ṭha dawn
Temple Square aṭanga Vaivakawn kawnga Dinthar pêng inkar chu PWD-in naktuk aṭangin an thawm ṭha dawn a, hei vang hian kawngpui chanve khàr a ni dawn. Kawngpuiah hnathawh tibuai theia lirthei leh bungrua dah phal a ni lo.
Venghlui, Republic Veng leh Upper Republic inrina péng ṭhuam, Pi Pangi Peng bul aṭanga Venghlui pan thlakna kawng chu vawiin hian thawm ṭhat a ni dawn a; hei vang hian kawngpui khâr a ni dawn. Hnathawh tibuai thei turin kawngpuiah lirthei leh bungrua dah phal a ni lo.

Alu chi sem
Champhai DC James Lalrinchhana chuan nimin khan Leisenzo khuaa farmer interest group (FIG) 10 hnuaia chhungkua 129 hnenah FOCUS kaltlangin alu chi (Kufri Jyoti variety) a sem a; alu chíngtute hnenah alu enkawl dan zirtir nghal a ni. Champhai district-ah hian khaw 60-ah FOCUS hnuaia inziak lut FIG 629 a awm mek.

Mi pahnih man
Lunglei police-te'n tun hnaia ruihhlo an man an chhui zuinaah February 20, 2023 khan Lalbiakveli (60) d/o Sapbuaia (L) leh Lalawmpuia (30) s/o Lalrokhawma (L), Lunglei Rahsi Veng ve ve an man. Mi pahnih hi Lunglei khawpuia ruihhlo khawihtu lian berte zinga mi nia hriat an nih thu Police thuchhuah chuan a tarlang.