ZPM ṭhalaite Assembly House bulah an pungkhawm; RRRa bâng turin an phût

ZPM Ṭhalai chu nimin khan Assembly House bulah an pungkhawm a, minister of state Robert Romawia Royte chu Assembly session neih mekah thu dik lo a sawi nia an hriat avangin báng tura phûtin an au rual.

ZPM ṭhalaite chu banner kengin Assembly House páwnah an pungkhawm a; minister of state Robert Romawia bâng tura an phût thu leh ZPM Legislature Party leader Lalduhoma an chhuan thuin an au rual a ni.

Assembly House-ah ZPM leader Lalduhoma infiam mite thlavâng hauha nasa taka a au chhuak chu an chhuan thu sawiin ZPM Ṭhalai chuan, "Infiam mite'n hliam an tawrha ngaihthah an nih ṭhin avanga hun rei tak chhung infiam mite hrehawm leh inthlahrung rêng rênga an awm laia infiam mite tana ding ngam leader kan nei hi a thlamuanthlâk kan ti hle," an ti.

Miriam Lalnunsiami nen phone-in an inbe lo anga sawitu Robert Romawia Royte chu Miriam Lalnunsiami nen an inbiak ngei si avang leh thu dik lo House-ah a sawi chuan bàn hial a inhuam avang leh, government deputy chief whip Lalrintluanga Sailo duh dan angin Robert Romawia chu a thusawiah ding turin ZPM Ṭhalai chuan an phût a, "Minister a nihna aṭang leh MLA a nihna aṭangin patling taka báng ngam turin kan phût," tiin, Miriam Lalnunsiami nen phone-a an inbiak leh biak loh chungchangah Robert Romawia'n a phût ang ngeia inquiry commission din turin Assembly Speaker an phût bawk.

ZPM ṭhalaite chuan, Assembly session-ah Mizo hmeichhe footballer pakhat nen phone-ah an inbiak loh thu Sports minister Robert Romawia'n a sawi nia sawiin, "Dâwt a sawi kha pawi kan ti a, infiammite phatsannaah kan ngai. Assembly House-ah Sport Minister berin infiammite a phatsan ta mai khan Zoram mipui a barakhaih hle a ni," an ti.

ZPM Ṭhalai chuan, ZPM leader Lalduhoma'n a thiam lohna pawma patling taka House-ah ngaihdam a dil chu an chhuan thu an tarlang a; minister Robert Romawia chu Sport department a enkawlna danah, phûl lem phaha duh tâwk a, infiammite'n an biak phak leh an mamawh huna an koh eih phâka a awm loh avangin Sport minister ni tlaka an ngaih loh thu an tarlang bawk.