Sipai officer-a lut turin ṭhalaite sáwm

Army Recruiting Officer, Aizawla director Col. Sarwan Kumar chuan nimin khan Aizawl Press Club-ah thuthar thehdarhtute kâwmin, sipai officer-a luh tum turin Mizo ṭhalaite a sáwm a; Agnipath scheme chuan hnuaia sipai officer lak dan thar leh tun hnaia sipai officer lâkna buatsaih tur a sawifiah.

Col. Sarwan Kumar chuan, Indian Army-in mipa nupui nei lo te, kum 17-21 inkar tan Agnipath scheme hnuaiah junior commissioned officer dilna hawn a nih thu a sawi a, "Kumin February 16 aṭanga March 15 chhungin online registra­tion tih theih a ni," a ti a, inziak luta dil turin Mizo ṭhalaite a sáwm a ni.

Col. Sarwan Kumar sawi danin, sipai officer dil tumte tan www.joinindianarmv.inc.in ah luha inziah luh tur a ni a, personal profile siam tur a ni. Dilnaah online hmangin Rs 250 pek a ngai a, exam centre panga 176 zingah panga duh thlan tur a ni. Aadhaar number leh Aadhaar number thlun zawm phone number leh email thun a ngai.

Website www.joinin­dianarmv.nic.in ah vêk online-in written examination neih a ni dawn a, chuta tlingte chuan online bawkin Common Entrance Examination an hmachhawn leh ang a, chumi hnuah physical test neih tur a ni.

Aizawla Army Recruit­ment Office phone num­ber 2351166 & 2351118-ah emaw, email: aroaizawl@gmail.com ah emaw zawhfiah theih a ni.