MZU Southern Campus sakna tur atan Central aṭangin approval la hmu lo
Higher & Technical Education (HTE) minister Dr R Lalthangliana chuan ZPM member C Lalsawivunga zawhna chhángin, MZU Southern Campus sakna atan sorkar laipui aṭangin DPR approval (pawmpuina) hmuh a la nih loh thu Assembly House a hrilh.
Dr R Lalthangliana chuan, MZU Southern Campus sakna tur sorkar laipui aṭangin pawmpuina hmuh a la nih loh avangin zirna ṭan a la ni lo tih a sawi a, "Temporary class atana hman tur Mizoram Engineering College, Lunglei chei leh buatsaih hna peih a la ni lo," a ti.
HTE Minister-in ZPM member Lalduhoma zawhna a chhan danin, MZU Southern Campus din a nih theih nan November 2013 khan Ministry of Human Resources Development (MHRD)-ah dilna thawn a ni a, MHRD chuan January 17, 2020 khan a thuphungin phalna a pe.
Zawh belhna chhangin R Lalthangliana chuan, MZU Southern Campus din turin Mizoram sorkarin tih theih a neih tam loh thu a sawi a, "MZU lam nen an indawr a, ṭhahnemngaihna avangin keini lam pawhin theihtawp chhuahin ministry lam kan dawr ve tho a ni," a ti.
HTE Minister chuan, MHRD-in MZU Southern Campus-a thawktu tur an la thei rih lo tih sawiin, "A chhan chu Covid-19 avangin hna lâkah sorkar laipui inkhuahkhirh vang a ni," a ti a; MZU-a awm sate'n Southern Campus hmui rih mai se tih chu MHRD ngaihdan a nih thu a sawi.
MZU Southern Campus atana class lâk lailâwkna atan Mizoram Engineering College cheibàwl turin sum a hautak thu sawiin Minister chuan, "Inkalpawhna kawng km. 3 vel siam a ngai a, electric current leh tui pawh a la awm lo. Hengte ti tur hian cheng vbc. 10 vel a ngai dawn a, state sum aṭang chuan a harsa tham a ni," a ti.