Bomb hmanga ATM beitu man a ni ATM dang beih leh a tum niin hria

February 18, 2023 zing dar 2:50 -a Republic Veng Kawipuia ATM booth bomb hmanga beitu chu man a ni a, Immanuel Lalbiak­zauva (24) s/o PC Chhuahkhama (L), Bawngthah khua, Ramhlun North-a mi in luaha khawsa mek a ni.

Bomb hmanga ATM beih chungchang chhui tura din Special Investigation Team (SIT), Aizawl additional SP PC Lalṭanpuia kaihhruai chuan ATM beitu hi February 22, Nilaini khan an man a; man ni lo se chuan ATM dang bomb hmangin beih leh a tum nia hriat a ni.

Aizawl SP C Lalruaia chuan nimin khan a pisaah thuthar thehdarhtute kâwmin, ATM bomb-tu man a nih thu a puang a; ATM rawk tuma ralthuam hman a nih avangin an hotute'n an ngai thutak hle tih sawiin, "SIT din a nih bakah, misual man kawnga pui thei tur, thu pawimawh hriattir theitu hnenah Rs 20,000 thlengin pek kan inhuam a ni," a ti.

SIT-in ngawrh taka an chhui thu sawiin Aizawl SP chuan, "February 18 tlai lamah Apex Bank ATM, Bethlehem Vengah misual pakhat lutin, CCTV a kah dum thu report dawn a ni a, February 21 tlai lamah Saikhamakawna SBI ATM kar chhiat leh a ni bawk," a ti a; chu'ng thil thlengte chu Republic Venga ATM-a thil thlengin inkaihhnawihna a neih leh neih loh uluk taka zir chian a nih thu a sawi.

C Lalruaia chuan, ATM pathum khawihtu chu mi thuhmun a ni ngei tih finfiah a nih thu sawiin, "A chêt velna chhui zui nghal a ni a, Ramhlun North thlànmual mawng lamah chhui luih a ni. SIT chuan chu lai hmuna bike ding, inkhuh chu pawikhawihtu ta a nih an rinhleh avangin an châng a, an mi rinhlelh chu February 22 khan an man ta a ni," a ti.

Aizawl SP sawi danin, Lal­biakzauva'n bike a hman ṭhin chu January 2023-a a rûk a ni a, tihdanglam a ni. Man a nih hian a ipah gelatin panga hmuh a ni a, a bike-ah thir tiang ṭâwn beh a ni bawk. ATM a beih ṭuma a hmaikáwr vuah chu tichhe tawh mahse hmuh lêt a ni a, a thawmhnaw hâk ṭhinte pawh hmuh a ni.

Immanuel Lalbiakzauva'n police-te hnena a sawi danin, ni tin inhlawh a nin avangin SBI-ah bul ṭanna atan loan a dil a, an pek duh loh avanga a thinrimin SBI ATM-te a bitum ṭhin a ni. Police-te'n man lo se chuan ATM dang pawh bomb hmanga beih leh a la tum thu a sawi bawk.