CCTV vuah uar turin ngen

Aizawl SP C Lalruaia chuan, tunlai hian rûkrûk a tam tak zet thu a sawi a; pawi khawihna a thlenin police-te'n hnu an chhuina atan closed-circuit television (CCTV) a ṭangkai em avangin CCTV vuah uar turin mipui a ngen.

Nimina a pisaa thuthar thehdarhtute a kawmnaah Aizawl SP chuan, rûkrûk a hluar thu sawiin, "Police-te'n theihtawp kan chhuah ṭhin a, man chhuah pawh eng emaw zat kan nei. Chutih rualin, kan man chhuah zawng zawng mipui hriat­ah kan puangzar lo," an ti.

C Lalruaia chuan, police-in hnu an chhuinaah CCTV an hmang ṭangkai tak zet tih sawiin, "Ram dang police-te pawhin CCTV hi hmanraw ṭangkai takah an hmang," a ti a; rûkrûk hluar lutuk tihziaawm a nih theih nan leh misual man chhuah an nih theih nan CCTV vuah uar turin mipui a ngen a ni.

Aizawl SP chuan, two wheeler bo a tam ṭhin thu sawiin, "Two wheeler rûk a nih hian a lock an tichhia a, chu chu thlâk leh a ngai ṭhin. Hetiang part chauh thlak tum an awm a nih chuan police-ah hriattir vat ṭhin turin workshop neitute kan ngen a ni," a ti bawk.