Congress kan sorkar a nih chuan Catch Them Young kan kalpui dawn - Lalsawta

Mizoram Pradesh Congress Committee (MPCC) president Lalsawta chuan, Congress party an sorkar chuan football, cricket, boxing, hockey, volleyball leh infiamna dang dangah Catch Them Young kalpui a nih dawn thu a sawi.

Aizawl District Congress Committee-in February 22, Nilainia Hotel Ritz-a Aizawl City Block Office Bearers Meeting an buatsaih a hmanpuinaah Lalsawta chuan, infiamnaah Mizo ṭhalaite'n hma an sawn nasa tih sawiin, "Kan infiammite aṭanga Mizorama sum lut a ṭhahnem ve tawh hle. Chutih rualin, hmasawnna tur kan la ngah. Pathian leh mipui zarah sorkarna kan chang a nih chuan football, cricket, boxing, hockey, volleyball leh infiamna dangah Catch Them Young aṭanga bul ṭanin infiammi hlawhtling, India ram pum huap leh khawvel huapah kan neih theihna turin ṭan lak kan tum," a ti.

Sorkar siam hrim hrim an tum a ni lo tih sawiin Lalsawta chuan, "Sorkar ṭha siam ngei kan tum. Kan danglam tawh dawn a, kan danglam a nih loh chuan sorkarah mipui tan beisei tur a awm tawh dawn lo," a ti a; an danglamna chuan Mizoram chu dinhmun ṭha takah a siam dawn niin a sawi.