Mizoram hectare 1,600-a zauah Kuminah ṭhelrêt phun tum a ni

Chief minister Zoramthanga chu nimin zing khan Chief Minister's Office-ah Rubber Board of India executive director Dr KN Raghavan leh a thawhpuite a kâwm. Rubber Board hotute chuan, kumin chhungin Mizoramah ram hectare 1,600-a zauah ṭhelrêt phun tum a nih thu leh ṭhelret kûi ṭiahna (nursery) siam tum a nih thu an sawi.

Dr KN Raghavan chuan, ṭhelrêta hmalaknaah Mizoram sorkarin a ṭawiawm tawhnaah lawmthu a sawi a, "India hmarchhak state-in theihna (potential) a neih ṭhat avangin ngawrh takin ṭhelrêt chìnah hmalak mek a ni a, kum nga chhungin ram hectare 2,00,000-a zauah ṭhelret hmun siam tum a ni," a ti.

Ṭhelrêt hmun siam tumna chuan Mizoram pawh a huam thu sawiin KN Raghavan chuan, "Kumin chhung hian Mizoramah ram hectare 1,600-a zauah ṭhelrêt phun tum a ni a, a thlâwnin a ṭiak sem a ni ang," a ti a; hmalak a awlsam zawk nan nursery siam tum a nih thu a sawi.

CM Zoramthanga chuan, "Ṭhelrêt hi economy tihhmasawnna atan ṭha tak a ni a, Mizoram leh hmarchhak state dangte pawhin an ṭhatpui ngei ka beisei," a ti a; a phurh man a hniam zawk theih nan kawng (link road) siam chungchanga mamawh an thlen chungchangah a remchan angin theihtawp a chhuahpui tur thu a sawi a ni.

Ministry of Commerce and Industry hnuaia Rubber Board hotute hian nimin vêk khan chief secretary Dr Renu Sharma pawh a pisaah an kâwm a; Mizoramah ṭhelrêt chíngtu chhungkaw 1,200 vel an awm thu an sawi.

Dr Renu Sharma chuan, Mizoramah ṭhelrêt hmun siam leh thar chu loneitute'n an la hmelhriat lutuk loh avang leh mi tam tak tan thil thar a nih avangin inzirtirna neih ṭul a tih thu a sawi a, "Ṭhelrêt hian puitling turin kum eng emaw zat a duh avangin thlai leh thei dangte nen chìn pawlh dan ngaihtuah a pawimawh," a ti.

Rubber Board hian kum 2021 khan Mizoramah pisa an nei ṭan a, Mizoram hmun hrang hrangah ram hectare 1,500-a zauah hmalak mek niin, ṭhelrêt chíngtu chhungkua 1,200 vel an awm a ni.