Inthlahdah vanga chetsualna pawi ti

YMA, Mission Veng Branch chuan thuchhuah siamin, tun hnaia Sikulpuikawn bul MG Road-a kawng chhak lama lei laih vanga kawngpui chunga hrui uai thla avangin lirtheia tlânte'n harsatna an tâwk zauh zauh a, chetsual phah pawh an awm tih an tarlang a; thuneitute inthlahdah leh thil enfel ṭhat loh vanga chetsualna a thleng chu pawi an tih thu an sawi.

Hrui inzam hnawk leh fual lutuk avangin an hruaitu pakhat chu February 19, 2023 zana bike-a a tlân laiin bike handle bar (steering) chu hruiah inbâtin a chesual tih tarlangin YMA, Mission Veng Branch chuan, "A khingkhang ruh a tliah bakah a nâk ruh a sawh na tel bawk. February 21 khan Ebenezer Hospital-ah zai a ni nghe nghe," an ti a; thuneitute inthlahdah vanga chetsualna a thleng chu pawi an tih thu leh, inthlahdah vanga chetsualna a thlen tawh lohna turin thuneitute'n a rang lamin kawng kama in sate leh lei laitute enfelpui ṭhin se an duh thu an tarlang bawk.