Dan pawisa loa chê minister-te inthiar fihlim turin ZPM-in an chah

Zoram People's Movement (ZPM) party chuan nimin khan Aizawla Transport directorate bul kawngpuiah mual inkhawm an buatsaih a; minister zinga hlemhlêtna leh dan pawisa loa chête chu dan rorelna nghâk kher loa mahni chhia leh ṭha hriatna hmanga inthiar fihlîm nacháng hre turin an chah.

ZPM mual inkhawmah hian resolution an siam a; chief minister Zoramthanga kaihhruai Mizoram sorkara minister zingah hlemhlêtna leh dan pawisa loa che an awm chu an hriatthiam loh thu tarlangin, "Dan rorelna nghak kher loa anmahni chhia leh ṭha hriatna hmanga inthiar fihlim nacháng hre turin kan beisei a ni," an ti.

Inkhawma thu sawitu ZPM working president K Sapdanga chuan, "Sport lama kan sum khawih dan hi ZPM chuan chîk lehzualin kan ûm zui dawn a, dan bawhchhiatna a awm a nih chuan hlahthlem kan tum lo," tiin a sawi.

ZPM Working President chuan, Chief Minister leh Sport Minister ten cheng vaibelchhe chanchin hlir an sawi lai leh restricted tender hmanga consultancy firm leh construction firm an vei sung sung laiin, infiammite an inhliamin mahnia inenkawl a ngai tih a sawi a, "Sports association-te ṭan lak vena tur Promotional Fund awm sa reng pawh kan hrênsak bawk si," a ti.

K Sapdanga chuan, "Sport lama kan sum khawih dan hi ZPM chuan chîk lehzualin kan ûm zui dawn a, dan bawhchhiatna a awm a nih chuan hlahthlem kan tum lo ang," a ti a; infiam mite hmasawnna dâltu an awm a nih chuan thianfai turin ZPM-in hma an hruai dawn thu a sawi.

Assembly House-ah ZPM Legis­lature Party Leader leh Sport Minister inhnialnaa thu inchuh ṭhelh nan Speaker-in dâwt sawi zawkin ngaihdam dil turin a chalrem tih sawiin Sapdanga chuan, "ZPM Leader chuan a ṭanna kha dik loa a hriat avangin dâwt phuahchawpa ṭan ṭâlh a tum lo. Kan hotupa hi chu cheng vbc. 9 lai lo nei ve palh ta se, law court-in khawia mi nge i neih, tiin zawt ve pawh ni se, 'Ka u fate ta an lo dah lâwk mai a ni,' tih nachang a hre ve miah lo ang," a ti.

K Sapdanga chuan, Assembly House-ah Lalduhoma'n ngaihdam a dil chu an chhuan thu sawiin, "Khatia a tih avang khan kan Leader kha huaisen kan ti a, kan chawimawi a, zui ngam a nihzia finfiah zelnaah kan ngai," a ti a, mualphona vàwrtàwp khum chunga khingpuite dik lo zawk pawh ngaidam thei hruaitu an nei chu lawmawm an tih thu a sawi.

ZPM PAC member TBC Lalvenchhunga chuan, Mizoram budget tharah mipui chan tur a awm mang lo tih sawiin, "Agriculture & allied sector-ah mipui 70% chuang kan innghah vena hmasawnna turin kan sorkar hian Rs 1,00,000 a dah. Pawisa nei, pawisak nei lo Chief Minister kan nei hi a zahthlak," a ti a; sorkar ṭha zawk Mizoramin a neih theih nan ZPM-in theihtawp an chhuah dawn thu a sawi.

Eptu pawlte chu sorkar khalh ngiltu tur an nih thu sawiin Lalvenchhunga chuan, "DCMA minister Pu R Lalzirliana leh Sports minister Pu Robert Romawia te hian dan an bawhchhe ngei tih ZPM leader Pu Lalduhoma’n House-ah a sawi tawh. Hmasawnna chhuanlama sumdawn nana sorkara thuneihna hmang sual duhtute hi insawifiah turin kan ngen tawh a, vawiin thlenga insawifiahna kan la hmuh loh avangin minister pahnihte hi anmahni chhia leh ṭha hriatna hmanga báng mai turin thuràwn kan pe a ni," a ti.

Minister pahnih chêt dan chu Chief Minister pawmpui a nih avangin MNF sorkar chu rorelna chelh chhunzawm tlâk an nih loh thu a sawi bawk.