NH kawngpui siam mekah stay order chhuah turin DC pahnih ngen an ni

Centre for Environment & Social Justice (CESJ) chuan Champhai DC leh Khawzawl DC hnenah National Highway and Infrastructure Development Corporation Limited (NHIDCL) hnuaia NH-06 Seling-Champhai kawngpui siam mekah dan palzût a nih avangin a rang thei ang bera hnathawh tihtawp a nih theih nan stay order pe turin an ngen.

CESJ hian district pahniha bawrhsapte hi February 23, 2023 khan lehkha hmangin ngenna an thawn a; RTI Act hmanga an zawhna chhannaa a lan danin, NH-06 kawng siamnaah environment dan leh hrai pakhat mah zawm a ni lo tih chiang taka a lan thu an tarlang.

Bawrhsap pahnihte hnenah hian CESJ chuan, "I district huam chhunga environment dan leh hrai zawng zawng bawhchhiaa NHIDCL-in hna an thawh mekah hian EFCC-in June 10, 2020-a notification a tihchhuah, District Monitoring Committee (DMC)-ah chairman i nihna angin heng dan loa environment tihchhiatna nasa tak thleng mekah hian DMC hian a tih tur a hlen lo hle niin kan hria. Kan environment derdêp tak tihchhiatna thleng mek leh la thleng zel thei tur vil tura ruat DMC hian tun aṭang chuan an koa mawhphurhna nghah hi an hlen kan phût," an ti.

Kawngpui siamtute'n ram leilung fate zahna nei miah loa thil ti a, nasa taka environment an tihchhiat avangin kawngpui siam mek chu tihtawp rih a nih theih nan chawlhkar khat chhunga stay order pe turin DC pahnihte an phût a, "Kan phût anga stay order pek a nih loh chuan National Green Tribunal-ah complain kan siam dawn," an ti a; an district-ah nasa taka environment dan palzûtna a awm reng chung pawha District Magistrate an nih anga hmalakna an hmuh loh chuan NGT-ah khin an tum thu an ziak a ni.