Kamrul-a lo contractor dang pawhin trolley an hmanga hriat a ni - CM

General Adminis­tration deparment changtu chief minister Zoramthanga chuan INC member C Ngun­lianchunga zawhna chhángin, Lengpui Airport-a luggage trolley chu Kamrul-a bakah, contractor dang pawhin an hmang nia hriat a nih thu House a hrilh.

Lengpui Airport-a trolley a bo tâk duak chhan zawhna chhangin Chief Minister chuan, "Lengpui Airport-a trolley hman tlak tlem ta hi a bo duak a ni lo a, a chhiat vanga hman tlak a tlem vang a ni," a ti a, tunah hian 25 vel hman tlak a awm thu a sawi.

Chief Minister chuan, 'Kamrul-a hnathawkte'n cement nawrna atan an hmang chhe vek a, pali/panga bak a awm tawh lo tih hi a dik em,' tih zawhna chhangin, "Sawi ang hian contractor-te'n trolley hi an lo hmang ngei a, kan lo hriat danin Kamrul-a lo contractor dang pawhin an hmang nia hriat a ni," a ti.