CM beitute chu ui ke táng chiau, kal ngaihna hre tawh lo an ni - Adviser to CM

Adviser to chief minister K Lalsawmvela chuan, chief minister Zoramthanga beitu eptu party -te chu ui ke táng chiau, kal ngaihna hre tawh lo ho an nih thu a sawi a; ramri chungchanga Mizoram leh Assam chief minister-te inbiaknaa tel ve Abu Majumdar chu CM Zoramthanga hruai a ni lo a, Assam CM hruai niin a sawi bawk.

Nimina Mizo Hnam Rûna chhung inkhawmah thu sawiin K Lalsawmvela chuan, "Opposition-te'n Chief Minister an beihna hrang hrangte hi sevedal inzirtirna, 'Dâwt za i sawia pakhatin a awih chuan i hlawhtling a ni' tih inzirtirna kha a ni a, a beitute hi ui ke táng chiau, kal ngaihna hre tawh lo ho an ni," a ti.

K Lalsawmvela chuan, "Beram hmul mêttu hmaa ngawi reng ang maiin kan CM hian a beitute a bei lêt ve ngai lo," a ti a; MNF president Zoramthanga chu beih a nihnaah a ngawi reng niin a sawi.

Buhfai supply-tu Abu Majumdar chu Congress sorkar hun lai aṭanga Mizorama buhfai supply-tu ber a nia sawiin Lalsawmvela chuan, "Assam nen kan inkah khan Assam Chief Minister chuan Pu Zoramthanga rawn biak a duh a. Assam CM chuan Abu Majumdar ruaiin palaiah a tír a, Delhi-a an inbiakna thlalâkah Abu Majumdar chu lo langin vein, social media-ah Pu Zoramthanga hruai angin an puh hlauh thung a, Assam CM hruai zawk a ni, Pu Zoramthanga hruai a ni lo," a ti.

Kamrul-a chungchangah K Lalsawmvela chuan, "Kamrula Chhangte tih pawh hi Congress hun laia tribal certificate pek a ni a, Congress sorkarah khan contract hna lian deuh deuh hmun riatah a hmu a, cheng nuai 4,400 chuang man hna a thawk a ni," a ti. MNF sorkar hnathawhte a sawi lan bakah, kumina MLA General Election awm turah MNF an tling leh ngei dawn niin a sawi bawk.