Spiritual Sub-Committee hmalaknain Gospel camping vawi 6 neih a ni tawh

General Administration Department changtu chief minister Zoramthanga chuan ZPM member Lalduhoma zawhna chhángin, August 14, 2019-a din Spiritual Sub-Committtee a la din thu leh ram pum huap atana din a nih loh thu Assembly House a hrilh.

Spiritual Sub-Committtee-in a tih tawh zawhna chhangin Chief Minister chuan, "Spiritual Sub-Committee hmalakna hian gospel camping vawi ruk neih a ni tawh," a ti.

Lalduhoma chuan, Spiritual Sub-Committee chu sorkar khalh ngíltu atan sorkar hmasain Ethics Committee a din ang deuha a lo ngaih thu a sawi a; Zoramthanga chuan, Social Rehabilitation Board rawtna anga din a nih thu sawiin, "Jordan Centre-a awmte target a ni deuh ber. Mahse, Covid-19 avangin Jordan Centre hi Covid-19 veite awmna hmun atana hman a ni," a ti a, Committee chu ram pum huap tura din a nih loh thu a sawi.

SEDP sum aṭanga chaplain office sakna tura February 6, 2020-a cheng nuai 29.05 dah chu hman a nih leh nih loh Lalduhoma'n a zawhna chhangin Chief Minister chuan, "February 6, 2020-ah SEDP sum aṭangin chaplain office sakna tur dah a ni lo," a ti.

Hetihlai hian, Lalduhoma chuan February 29, 2020-a Assembly session-a a zawhna ziaka chhan a nih danin, chaplain sakna atan SEDP sum aṭangin cheng nuai 29.05 sanction a nih thu leh hman a la nih loh thu tarlan a nih thu a sawi.

Chief Minister chuan, Lengpui Airport-ah a hranpain chaplain office sak ni se tih a nih thu sawiin, "Cheng nuai 29.05 chu a tlem deuh avangin airport chei ṭhatah changtlung zawk law lawin, thil dang awmna tur nen sa ang kan ti a. Cheng vbc. chuang fêin sak mek a ni," a ti.