House-ah private resolution pahnih pawm; Myanmar raltlan 31,050; Bangladesh raltlan 384

Nimina Assembly session-ah ZPM member Lal­chhuanthanga leh INC member Lalrindika Ralte ten private member resolution an put luh chu sawiho hnuah pawm a ni. Home minister Lalchamliana chuan, sorkar record angin, Mizoramah Myanmar aṭanga raltlan mi 31,050 leh Bangladesh aṭanga raltlan mi 384 an awm thu a sawi.

Lalchhuanthanga resolu­tion put luh chu, 'Kawngpui ṭha leh building ṭha kan neih theih nan tun aia ulukin hna thawh ni rawh se' tih a ni a; Lalrindika Ralte put luh chu, 'Kan ram ṭhenawmte aṭanga sahimna zawnga rawn raltlante hi kan sorkar hian an awmna tur siamsakin duat takin enkawl se. Awm khawmna tur hmun bik ngaihtuahsak rawh se,' tih a ni.

Resolution pahnih hi sawiho a nih hnuah pawm a ni a; Lalrindika Ralte resolution erawh chu tidanglam hretin, 'Kan ram ṭhenawm Myanmar leh Bangaldesh aṭanga sahimna zawnga kan unau raltlana lo kalte Mizoram sorkar leh Mizoram mipuite'n ṭha taka kan lo dawngsawng hi a lawmawm kan ti a, a ṭul ang zela lo tuamhlâwm chhunzawmin, an awmna tur leh mamawhte ngaihtuah zel ni se kan ti,' tia pawm a ni.

Home minister Lalcham­liana chuan, Mizoramah Myanmar ráltlan mi 31,050 an awm mek a, chung zinga mi 13,540 chu relief camp 162-ah an awm thu leh a dang zawng chu relief camp ni loah an awm thu a sawi a, "Myanmar aṭanga rawn lutte hi a zat chiah hriat a har hle. A ṭhen an han haw lawk a, buhte an han seng a, an rawn lut leh a, figure chiah chiah hriat a har, mi 31,000 velah dah ila a ṭha maiin ka ring," a ti.

Lalchamliana chuan, Myanmar aṭanga raltlante chu identity card siamsak vek tum a nih thu sawiin, "Tunah hian mi sawm hnih/khat tih loh chu ID pek vek tawh an ni," a ti a; relief camp-ah Mizoram sorkarin ṭanpuina pein, cheng nuai 384 vel sengin ṭanpuina a pek tawh thu te, solar light, tui dah khâwlna, ek-in, green roof, silpauline, mutbu leh thosi lênte pek a nih thu leh, naupangte sikul kaltir an ni a, sikul an kalna tur leh zirlaibute ngaihtuahsak an nih thute a sawi.

Tunlaiin Mizoramah ruihhlo tawlh ruk a hluar viau karah raltlan zingah ruihhlo tawlhnaa inhnamhnawih an awm leh awm loh a chian loh thu sawiin Lalchamliana chuan, "Police hotute hnenah refugee-te hi a bik takin lo chîk teh u, kan ti a, tun thleng hian raltlan hote zinga mi an ni tih man fak kan la nei lo. Anni ho pawhin sorkarin kaihhruaina a siamte an zawm a, khawtlang tana thil ṭha lo tihna lakah insûm thei se kan duh," a ti.

Home Minister chuan, raltlante chu harsa takin an khawsa tih sawiin, "An khawngaihthlak em em. Mizoram sorkar hi sorkar pachhe tak a nih avangin duh angin thil a ti thei lo a, Mizo mipui kan ṭan rual a ngai," a ti a; raltlante chhawmdawlna atan MLA-te'n an fund aṭangin cheng nuai 10 ṭheuh emawte sik chhuak thei se a duh thu a

sawi bawk.