Kuhva rah tam tham tak man a ni
February 23, Ningani khan YMA leh police-te'n hmun pahnihah Myanmar aṭanga dan loa lak luh nia hriat kuhva rah tam tham tak an man.
Ningani tlai dar 4 vel khan YMA, Lengpui Model Branch chuan kuhva ro tam tham tak an khaw ram chhungah a awm thu an dawng a, Lengpui Model YMA chuan Sairang police, Lengpui Branch YMA leh Central YMA lam an hriattir nghal a; Lengpui leh Rawpuichhip inkarah satha ip aṭanga buara ipa kuhva rah an thun chhâwng lai nangchingin an man ta a ni.
Kuhva rah chu ip 370 a ni a, a neitute leh a phurtu truck pasarih, MZ-04 registration nei vekte leh lirthei khalhtute chu man an ni a, Customs hnenah an hlan a ni.
Ningani vek khan Seling police outpost-a police duty-te chuan lirthei pahnih, Lalsiamtluanga (32) s/o Sangrohnuna leh Lalthangliana (26) s/o Lalfakmawia, Chhungte, Champhai district ve ve nia inchhálte khalh aṭangin kuhva rah ip 75 (kg. 6,000 vel) an man.
Saitual police-te pawhin Khanpui Branch YMA aṭanga an thu dawn bawhzuiin February 22, 2023 khan kuhva rah ip 140 (kg. 11,200) an man a, a phurtu lirthei pali leh a khalhtute - Vanlalnunchhana (23), Champhai Vengsang, Lalchhuana (30), Zemabawk, Lalhmingsanga (26), Hmunhmelṭha leh Lalawia (57), Kawnpui te an man bawk.