KHAWTHLIR

Restricted tender
PWD enkawltu chief minister Zoramthanga chuan ZPM member Lalduhoma zawhna ziaka chhangin, kum 2019-20 aṭanga 2022-23 chhungin PWD hnuaiah restricted tender-in hna 121 pek a nih thu a tarlang a, department work-in hna 321 thawh a nih thu a tarlang bawk.

Awareness Rally
Lawngtlai Police, National Cadet Corps, Don Bosco School leh Central YLA hnuaia Drugs Reduction Squad-te chuan nimin khan Lawngtlai khawpuiah ruihhlo dona kawngzawh, Drugs Awareness Rally an huaihawt. January 2022 aṭanga January 2023 chhungin Lawngtlai police-te'n heroin gram 407.68, ganja gram 166.55 leh opium kg. 2 an man thu leh, NDPS Act hnuaiah thubuai 17 ziak lutin, mi 25 man an nih thu tarlan a ni.

Party hriatpuina telh turin ti lo
Supply minister K Lalrinliana chuan ZPM member Lalduhoma zawhna chhangin, retailer thar lakna tura tender chhuah ṭhinah MNF party group emaw, unit emaw hriatpuina (recommendation) thil tel turin Supply department-in a ti ngai lo niin Assembly House a hrilh.

AR-in meizial man
Assam Rifles chuan February 23, Zirtawpni khan Champhai Tlangsamah ram dang meizial, cheng nuai 54.6 man an man. Foreign cigarette mante hi Champhaia Customs department hnenah an hlan a ni.

Thuthlung ziak
Mara Autonomous District Council leh Mara Thyutlia Py (MTP) chuan nimin khan inner line permit leh dan loa hnam dang sumdawngte laka hmalakna turin thawh dunna thuthlung an ziak. Thuthlungah hian MADC chief executive member M Laikaw leh MTP assistant general secretary N Solomon Beihlotha ten hming an ziak a ni.

Himna inzirtir
Serchhip District Disaster Management Authority chuan nimin khan DC conference hall-ah kângmei laka himna chungchang inzirtirna an buatsaih a, SDDMA chairman Nazuk Kumar, bawrhsapin a hawng. Sorkar official, VC-te leh tlawmngai pawl hruaitute an tel a ni.