Serchhip MJA-in inkhawmpui an hmang

Mizoram Journalist Association (MJA), Serchhip district chuan nimin khan Serchhip Press Club-ah Annual Conference vawi 23-na an hmang a, Information & Public Relations deputy director K Saitluanga'n a hmanpui.

Inkhawmpui hi Serchhip MJA vice president C Ramengmawia'n a kaihruai a, khuallian bakah, president C Lalhminghlua ten thu an sawi. General secretary Zonunsanga Kawlni leh treasurer Lalremruata Ralte ten an pawl dinhmun an tarlang. Serchhip district-ah hian MJA member 14 an awm a ni.

K Saitluanga chuan, MJA chu Mizorama páwl zahawm ber pawl nia a hriat thu sawiin, "Mipui kaihruai ṭhintu, kawng dik leh thu dik kawhhmuh ṭhintu an nih avangin a chhunga member-te inngaih aia nasain mipuite'n kan zahin ka hria," a ti a, pawl hmingṭha tak ni zel turin duhsakna a hlan.

Serchhip khawpui mamawh leh harsatna chauh thlir lo a, district puma khaw dangte hre tel zel tura MJA chahin Saitluanga chuan, "Mipui rawngbawltu kan nihna hria a, mahni hamṭhatna chauh ûm loin, district mipui mamawh dah pawimawh ang che u. Member-te rilru put hmang dik se, thil ṭha tih duhnain inthlung nghet ila, pawl a zahawm zual zel dawn a ni," a ti.