Fire Awareness Road Show buatsaih a ni

25th February, 2023

Aizawl District Fire Prevention Committe huaihawtin nimin khan Chhimphei tlangdung khaw ṭhenkhatah Fire Awareness Road Show buatsaih a ni a; kângmei laka fimkhur a ṭulzia inzirtirna hun hman niin, thupui chu "Thapui thawhin kângmei chhuak tur i véng ang u' tih a ni.

Kângmei ven chung-chang inzirtirna hi Hualngohmun, Aibawk, Sateek, Maubuang, Sumsuih leh Hmuifang khuaahte buatsaih a ni a; Aizawl DFPC member secretary leh DFO (Aizawl) Laltlanhlua Zathang, Fire & Emergency Services hotute leh a kaihhnawih department aiawh te, Central YMA, Green Mizoram Network leh ASEP hruaitute an tel.

Road Show-a tarlan danin, kum 2022 khan Mizoramah hmun 128-ah kângmei a chhuak a, mi 15 an thih phah bakah, cheng vbc. 23 hû a kâng ral a ni.