MR leh Samagra zirtirtute dinhmun ṭha zawka an awm theih dan sorkarin a ngaihtuah mek - Education Minister

School Education minister Lalchhan-dama Ralte chuan nimin khan Assembly session-ah Mizoram sorkarin muster roll (MR) zirtirtute leh Samagra hnuaia thawkte dinhmun ṭha zawka an din theih dan tur a ngaihtuah mek thu House a hrilh.

MLA hrang hrang zawhna chhangin Minister chuan, Samagra hnuaia thawkte mass regularisation (a náwlpuia dah ngheh) a theih loh pawhin seniority base-a regular (dah ngheh) dan sorkarin a ngaihtuah mek thu a sawi a, "Chief Minister-in Samagra hnuaia thawkte special arrangement scheme hmanga an dinhmun dah nghehna tur a sawi chungchangah sorkarah rawtna thlen mek a ni a, sorkar sum dinhmunte thlir chungin ngaihtuah mek a ni," a ti.

Lalchhandama Ralte chuan, MR teacher-te pawh dinhmun ṭha zawka an din theih dan tur ngaihtuah a nih thu sawiin, "Sorkarah provisional employee-ah a dah theih loh em ni tiin rawtna kan siam tawh. MR teacher-te hi MR skill-2 hlawh ang pek an ni a, kan department chan tho LESDE lam aṭangin MR-te hlawh san tura rawtna kan thlen tawh," a ti a; MR teacher-te chu provisional employee-ah dah an nih loh pawhin an hlawh a pun a beiseiawm thu a sawi.

Member hrang hrangte'n an bial chhunga headmaster dah tura an ngen chungchangah Lalchhandama Ralte chuan, "A ṭhen kan pe a, a ṭhen kan la chhuak. Indaih lohna a awm avangin a theih ang angin sem rual a ni," a ti.

Mizorama private school, adhoc aided leh grants-in-aid school-te dinhmun sang zawka dah tumna a awm leh awm loh zawhna chhangin Education Minister chuan, upgrade tura ngaihtuah mek a nih thu a sawi.