Chanmari West-a kawng siam a tlo lo, two wheeler 70 vel an tlûk phah tawh ; Corporator-in PWD-ah complaint a thehlut

27th February, 2023

Mizoram PWD-in Chanmari - Chanmari West - Vaivakawn inkar kawngpui an siamah ràwra nâwi khawk a tam avangin two wheeler lirthei tan a him lo hle a, two wheeler 70 vel an tlu tawh nia thu dawn a ni. AMC-a bialtu (Ward-Vl) corporator John Zosangliana Ralte-in PWD-ah complaint a thehlut.

Chanmari - Chanmari West - Vaivakawn kawng hi PWD, Aizawl North Division chuan February 2-11, 2023 chhung khan an thawm ṭha a, kawngpui khuar laite hnawh a ni.

Kawng siam ṭha lo chungchangah hian Ward-VI corporator John Zosangliana Ralte chuan February 24, 2023 khan PWD, Aizawl North Division Executive Engineer (EE) hnenah complaint a thehlut a, a hma thei ang bera siam ṭha leh turin a ngen.

John Zosangliana Ralte chuan, PWD EE hnenah hian junior engineer (JE) enpui chung pawha sum tam tak sénga chhe lutuka kawngpui an siam chu ṭha lo a tih thu leh pawi a tih thu te, kawng siam chhe lutuk vanga lirthei tam tak an chetsual phah thu leh, hmun ṭhenkhat chu a khawh leh vek tawh thute a thlen a ni.

Kawngpuia alkatra luan (blacktopping) dawna thli (air) hmanga kawngpui phuh fai chuan khawpui chhungah boruak bawlhhlawh a siam nasat ṭhin avang leh a chhehvela chenna inte a tihbalh ṭhin avangin labour-te'n uluk taka an phiah/ nawh fai mai a ṭhat zawk thu Corporator chuan a hrilh bawk.

Thu dawn danin, Chanmari West-a Damdiai sarêp zawrhna bul leh Presbyterian kohhran biak-in thlen hma kawng kualah kawngpui siamnaa râwra nâwi a tam lutuk avangin two wheeler 70 vel tluin an chesual tawh a, lirthei khalhtu eng emaw zat an inhlaim phah tawh.

Kawng siamnaa hman râwra leh alkatra a inchâr ngheh loh avangin siam zawh a nih aṭanga chawlhkar hnih vel chhungin kawngpui chu a khawk chhe leh nual tawh a, nimin thleng khan kawng siamna râwra nâwi phiah fai tur a la awm. Hmun ṭhenkhatah chuan râwra tel loin alkatra chauh luan a ni.

Kawngpui thawm ṭhat chu vawiin hian Bialtu MLA leh Bialtu corporator hoin PWD hotute'n an enfiah dawn nia thu dawn a ni.