KHAWTHLIR

Thisen pe
February 25, Inrinni khan KṬP, Dawrpui Bial chuan Civil Hospital, Aizawl tan thisen unit 90 an pe a, petute mipa 74 leh hmeichhia 16 an ni a; KṬP, Ramhlun Branch pawhin KṬP Day pualin Synod Hospital tan thisen unit 46 pein, petute mipa 38 leh hmeichhia pariat an ni. Inrinni vêk khan ṬKP, Serchhip Bialte'n Serchhip District Hospital-ah thisen unit 22 an pe a, petute mipa 16 leh hmeichhia paruk an ni.

Rawng kah zirtir
Confederation of Indian Industry (CII), Young Indians - Mizoram Chapter leh Asian Paints-te chuan February 24-25, 2023 chhung khan Baktawng Wood Carpentry Cluster, Chhuanthar, Tlangnuamah rawng kah, rawng hnawih leh rawng siam inzirtirna hun an buatsaih a, Chhuanthar Carpentry Society member eng emaw zat an tel.

Thiin hmu
Vanlalsawma (40) h/o Lalrinmawii, Tuikual South chu January 24, 2023, Zirtawpni tlai dar 5 vel aṭangin chin hriat lohin a bo a, nimin chhun dar 12:30 vel khan thia hmuh a ni. Vanlalsawma hi Sateek rama thlám aṭangin a chhuak a, a awmna chin hriat zui a ni lo a, nimin khan khawtlang huapa zawn niin, Tuikual South aṭang pawhin mi eng emaw zat an thawk chhuak a; thlám aṭanga hla vak lo léngkîr mawngah thia hmuh a ni.

Silai kah inelna
Champhai District Fire Prevention Committee leh Chawnchhim Rifle Club (CRC) chuan February 25, Inrinni khan Champhai Zote khelmualah kângmei vên leh nungcha humhalh inzirtirna pualin Champhai District Shooting Competition an buatsaih a, bawrhsap James Lalrinchhana'n a hmanpui. Competition-ah hian thupui chu 'Thapui thawhin kângmei i véng ang u' tih a ni a, mi 174 an tel a ni.

BJP-in lawmawm ti
BJP, Mizoram Pradesh chuan thuchhuah siamin, AMC buatsaiha Aizawl Day lawm a ni chu lawmawm an tih thu an tarlang a, "Aizawl khawpui hi vawiina cheng mekte ta a nih avangin, Mizoram hmél lanna pawimawh ber pakhat a ni a, thianghlimna leh faina kawngah state dangte, Mizorama district dangte tan ngei pawh entawn tlak ni thei tura theihtawp chhuaha hma la zel turin kan inngen a ni," an ti.

UDPA ngenna
UDPA department chuan, Mizoramin March 1-3, 2023 chhunga G-20 business meeting a thlen turah Aizawl khawpui kawngpui dung leh Lengpui Airport kawngah hmasawnna hna thawh chawlhsan ni se, an ti a, bawlhhlawh lam chi phur lirthei veivâk a awm loh nan local council leh village council-ten mahni huam chhung ṭheuhah hma lo la se, a ti bawk. Faina lama hmalaknaah harsatna nei tan UDPA-ah hriattir turin an ngen a ni.

MADC VC inthlan Inbuatsaihna thlir
State election commissioner Laima Chozah chuan February 23, 2023 khan Siaha DC confe-rence room-ah MADC hnuaia village council inthlanpui awm tura inbuatsaihnate Siaha district-a sorkar hotute a sawipui. Laima Chozah chuan, an hnat-hawhna hmuna ṭanpui an ngaih hunah an tan a awm reng tur thu kal khawmte a hrilh a, theihtawp chhuah turin a chah.

PC party-in MLA-te mak an ti
Peoples' Conference party chuan thuchhuah siamin, Zo hnahthlak ráltlânte official refugee-a pawm tura rawtna MLA-te'n an nei lo chu mak an tih thu an tarlang. PC party chuan, budget session neih mekah Myanmar leh Bangladesh aṭanga sahimna zawnga Zo hnahthlak ráltlân duat taka enkawl tura MLA-te'n thutlukna an siam chu lawmawm an tih thu an tarlang a; chutih rualin, "Ráltlânte dinhmun chawikan nan leh an hamṭhat zawk nana official refugee-a pawm an nih theihna tur hawi zawnga kan MLA-te'n hmalakna an nei miah lo erawh chu mak kan ti. Kan unau dinhmun derthâwng taka awmte ngaihtuahna zîktluak a neih loh thlâk kan ti hle," an ti.