Johnson Garden enkawltute'n zu an zawrh loh thu an puang

Ramthansiama, Mannfred Z John leh Nicholas Z John te chuan thuchhuah siamin, Johnson Garden, Muanna Veng, Zuangtuiah zu an zuar ngai lo niin an tarlang.

Mi pathumte chuan, Feb. 23, 2023 khan Assembly House-ah MLA Zodintluanga Ralte-in Johnson Garden-a restau­rant-ah whisky, wine leh rum duh tâwka lei tur a awm tih sawiin, thu dik loin puh hmingchhiat a tum niin an tarlang a, "Hetianga thu dik lo leh belhchian dâwl lo, finfiahna sawi tur eng mah nei loa MLA-in Assembly House chhungah ngei min puh hi kan hrethiam loin kan la na hle," an ti.

Mi pathumte chuan, "Johnson Garden-ah hian engtik lai mahin zu kan zuar ngai lo a, sorkarin phalna neite tana zawrh a phal, Mizoram thar grape aṭanga wine siam tak ngial pawh kan zuar ngai lo. Finfiahna nei si loa hetianga min puh mai hi kan sumdawnna min tihchhiatsak tumna a nih bakah, Assembly House leh member-te zah lohna lian tak, mipui hmuhsitna tling a niin kan hria. Zu lam chi rêng rêng kan zuar lo," an ti a; chutih rualin, eit ur tui tak tak an zawrh thu an tarlang.

Ramthansiama, Mann-fred Z John leh Nicho­las Z John te chuan, Mizo ṭhalai, mahni kutkawiha eizawnna daptute fuih záwng ni lo, thu dik lo hmanga an rilru tiná leh tihnual zawnga ram hruaitu a ṭawng chhuak chu pawi an tih thu an tarlang bawk.

Congress Legislature Party leader Zodintluanga Ralte chuan Feb. 23, 2023 khan Assembly House-a demand sawi­honaah, Mizo­ram hruaitu lu ber fapate restaurant-ah zu chi hrang hrang duh duha lei tur a awm thu a sawi a; restaurant hming a sawi lang lo thung.

Zodintluanga Ralte chuan, "Kan hotu lu ber fate restaurant-ah chuan wine leh whiskey leh rum duh tâwka order theihin zuk awma maw le. Chutiang chuan total prohibition hi a hlawhtling kan ti thei a maw? A ni lo a ni," tiin a sawi a ni.