Aizawl Day lawmna khâr a ni

February 25, 2023 kha Aizawl Day vawi 134-na a ni a, Aizawl Municipal Corporation (AMC) huaihawtin Lam­mualah lawm niin, lawm­man chi hrang hrang sem a ni. Kumin hi AMC huaihawta Aizawl Day lawm vawi khatna a ni.

Aizawl din champha vawi 133-na lawmna pui ber leh a khârna inkhawmah Aizawl mayor Lalrinenga Sailo khuallian a ni a; Mayor chuan, February 25, 1890 aṭangin mei mit loin Aizawl luah ṭan a ni tih sawiin, "He ní hi Aizawl khawpui din ṭan ní-ah chhiar a ni," a ti.

AMC ward-te inelna football tournament-ah Ward-XII (Dinthar, Tuikual North, Tuikual South) an chak ber a, band contest-ah Sol Nova Band pakhatna an ni. Ward fai berah Ward-I (Durtlang, Durtlang Leitan, Durtlang North, Selesih, Zuangtui) thlan a ni bawk. Intihsiakna hrang hranga ti ṭhate hnenah hian Aizawl Day lawm khàrna inkhawmah lawmman sem a ni.

Mayor Lalrinenga Sailo chuan, kum 133 chhungin Aizawlin hun hlimawm tak takte leh hun khirhkhân tak tak a paltlang thu sawiin, "Indopui Pakhatnaah phei chuan France rama kal turin Sipai Lammualah Mizo tlangval 2,100 zet an pung khawm a, mi ramte ang bawkin Aizawl hian history tam tak a nei a ni," a ti a; sorkarin ruahmanna a siam te, dan a duan te, in leh lo sak dan te, khawpui enkawl danahte sorkar dan zâwm hrâm hrâm turin mipui a sáwm.

Aizawl Mayor chuan, Aizawl mipuite'n Aizawl Day pualin hun hlimawm tak hman an phûa an hriat avangin AMC-in Aizawl Day ropui taka lawm a rêl thu leh hun lo la kal zel turah pawh Aizawl Day lawm zel tum a nih thu a sawi a; AMC din ṭan aṭanga tun thlengin Aizawl hmasawnna turin AMC-in hma a lâk thu leh Aizawlin hma a sâwn zel thu a sawi bawk.

Aizawl Day lawmna atan hian AMC chuan páwl hrang hrang nen thawkhoin, film festival, thiam thil pholanna exhibition, mi lem chan entirna (cosplay), naupang infiamna, band intihsiak, football tournament, costume parade, photo exhibition leh food stall-te an buatsaih a; Inrinni zing khan Aizawl Day Run huaihawt a ni bawk.

Aizawl din dan tarlan a nih danin, tuna Aizawla mi an awm ṭan hun tak hriat theih a ni lo a, hmânlaia lo awm tawh ṭhinte zinga mi Thado lal Hemroa, Lalsavunga leh Thanruma te chuan 1889 hma lam kum eng emaw zatah Aizawl an chhuahsan tawh a ni.

January 8-10, 1889 chhunga Upper Chengri Valley rûntu Lungtian lal Lianphunga hrem tura British India sorkar tirh WW Daly chuan Silchar aṭangin Mizoram a pan a, a hote zinga assistant superintendent pathum, sipai 400 leh kuli 700 an tel.

WW Dally leh a hote chuan February 25, 1890 khan Aijal Fort an din a, Aijal Fort din ní chu Aizawl din ní-ah pawm a ni. Tunah hian Aizawl khawpuiah mi 5,00,000 vel an chêng meka ngaih a ni.