Minister-in MUP inkhawmpui hmanpui

Mizoram Upa Pawl (MUP), Chalfilh Area chuan February 25, Inrinni khan East Phailenga Buizova Hall-ah inkhawmpui vawi 33-na an hmang a, minister Lalchhandama Ralte-in hmanpuiin, hmar tlangdunga Manipur kalpawhna kawng siam nan sorkar laipuiin cheng vbc 1,500 a pek tawh thu a sawi.

MUP member-te chu Pathian malsawmna, hriselna leh chakna an neih avanga member ni thei an nih thu sawiin Minister chuan, "Pathianin Mizote hnamah min din a, ṭawng leh sakhua min pe. Ṭhangthar zingah Mizo nunphung hre mumal lo an awm zel a, Mizo pasalṭhate an theihnghilh tawh a, hnam dang culture an ngaisang ṭan. Chuvangin, Mizo nunphung hi ngaihsantir leh a ngai a, nun kawng dik kawhhmuh an ngai," a ti a, naupang zawkte zirtirtu ni turin upate a chah.Lalchhandama Ralte chuan, ramin hma a sawn theih nan inkalpawhna kawngpui ṭha, zirna ṭha leh hriselna ṭha neih a ngaih thu a sawi a, "Heng mamawh bulpui neih nan hian sorkarin hma a la mek a, he tlangdung aṭanga Manipur kalpawh nan central sorkarin cheng vbc 1,500 a sanction tawh. Bagha nena inkalpawhna tur pawh bawhzui zel a ni," a ti.

MUP Chalfilh Area Conference-ah hian MUP branch pasarih awmin, member 769 an awm a; inkhawmpuiah hian an member thite sûnna hun an hmang a, ro an rel bakah, hruaitu thar an thlang a ni.