Health Minister-in Lungleiah laboratory leh ICU hawng

Health & Family Welfare minister Dr R Lalthangliana chuan February 25, Inrinni khan Civil Hospital, Lungleiah integrated laboratory leh naupang damlo na zual enkawlna tur Pediatric ICU a hawng. Minister chuan, health sub-centre awm lohna khaw 235-ah SEDP health clinic din turin sum pawh dah tawh a nih thu a sawi.

Dr R Lalthangliana chuan, Health department tichak turin hmunhma leh hmanrua tihchangtlun leh thawktu lâk belhah nasa taka hmalak mek a nih thu a sawi a, "Mizorama health sub-centre awm lohna khaw 235-ah SEDP health clinic din turin ruahmanna kalpui mek a ni a, pawisa pawh dah tawh a ni. Civil Hospital, Lunglei tichangtlung turin SEDP aṭangin cheng nuai 190 leh NEC aṭangin cheng nuai 392 ruahman a ni," a ti.

Minister chuan, Japan International Cooperation Agency nen ṭang dunin cheng nuai 70,000 sênga Cancer Superspeciality Hospital dinna turin vawiin (February 27, 2023) hian sorkar laipui leh JICA-in final memorandum of understanding an ziah dawn thu a sawi.

Lunglei Civil Hospital-a integrated laboratory din thar hi Mizoram sorkar sum hmanga bun a ni a, implementing department chu PWD niin, contractor chu KT Nghawra, Lunglei Zohnuai a ni. Sanction amount nuai 192.98 a ni a, work order amount cheng nuai 145.56 a ni thung. Laboratory-ah hian RT-PCR khawl leh thil dang enna khawlte dah a ni.

Pediatric ICU thar chu sorkar laipuia ‘India COVID-19 Emergency Response & Health System Preparedness Package: Phase-II (ECRP-II package) kaltlanga siam a ni a; khum pali awmna intensive care unit (ICU) leh khum pariat awmna high dependency unit (HDU) dah niin, enkawltu atan MBBS doctor pakhat, nurse paruk leh attendant pathum ruat tawh a ni.