Hnahthialah IPR office leh thawktu dah thuai turin MJA-in sorkar ngen

Mizoram Journalists' Association (MJA), Hnahthial District chuan February 25, Inrinni khan Hnahthial South-III VC House-ah Annual Conference vawi khatna an hmang a; resolution siamin, Hnahthialah Information & Public Relations officer leh thawktute sorkarin dah thuai se an duh thu an tarlang.

Hnahthial district MJA inkhawmpui hi an president F Zosangliana'n a kaihruai a, khuallian Bijoy Gurung, Hnahthial additional SP leh Hnahthial South-III VC president K Lalremliana ten thu an sawi. District MJA secretary Rodingluaia'n Hnahthial MJA chanchin leh hmalaknate a sawi bawk.

MJA, Hnahthial district hi kum 14 chhung chu MJA sub-division awm chhun niin, MJA, Lunglei district hnuaiah a awm ṭhin a, Hnahthial district a pian hnuah January 12, 2022 khan district-ah hlan kai a ni a, member paruk an awm mek a ni.

HNAHTHIAL MJA RESOLUTION 
1. Mizoram sorkarin Hnahthial district min pe leh min tihpuitlinsak mek hi lawmawm kan tiin, tun dinhmunah kan mamawh tak Information & Public Relations officer leh staff min dahsak thuai se kan duh hle.

2. Hun rei tak MJA, Hnahthialin neitu thinlung puin Hnahthiala hmun ṭha lai taka IPR department ram kan lo humhalhah hian IPR department office leh quarters min saksak thuai turin sorkar kan ngen a ni.