AR insawn hun tur hriat a ni lo; Mizo battalion-ah chhànna a awm lo

Nimin Assembly session-ah Home minister Lalchamliana chuan, Assam Rifles-te Aizawl khawpui laili aṭanga an insawn hun tur hriat a nih loh thu leh, Mizo hlang awmna tur sipai battalion chungchangah chhànna dawn a la nih loh thu House a hrilh.

INC member Zodintluanga Ralte-in AR insawn chhuah hun tur a zawhna chhangin Lalchamliana chuan, "Aizawl khawpui lailia awm Assam Rifles sawn chhuahna tur hian Mizoram sorkar chuan a tih tur a ti zo tawh," a ti a, an insawn chhuah hun tur chiang faka sawi theih a nih loh thu a tarlang.

Home Minister chuan, Assam Rifles-in Ministry of Home Affairs, New Delhi-ah chhuanlam an siam a, insawn chhuah hun an tikhawtlai niin a sawi.

ZPM member Lalduhoma'n, 'Mizo hlang awmna tur ramria duty tur battalion, Amit Shah-a'n min tiam kha bawhzui a ni em' tia a zawhna chhángin Lalchamliana chuan, "Chief Minister-in Union Home Minister hnenah DO letter hmangin tihlawhtling ngei turin a ngen a ni," a ti a; Mizoram sorkarin chhànna a la dawn loh thu a tarlang.

Zodintluanga Ralte leh ZPM member Vanlalhlana te zawhna chhangin Lalchamliana chuan, Assam state-in Mizoram ram chhuhsak a nei lo niin a tarlang a, "A nihna takah chuan Assam-in ramria a pawm notification no. 2106 AP ni March 9, 1933 pêlin tun dinhmunah kan awm (hmun eng emaw zatah)," a ti.

Home Minister sawi danin, Mizoramin ramria a pawm notification no. 2299 P ni August 1875 thleng luah turin Mizoram sorkarin hma a la mek a ni.

Zodintluanga'n Mizoram chhunga awm, Assam state ramri hrûla awm huan leh thlai neite'n an huan thlai rah seng chungchangah harsatna an tawh leh tawh loh a zawhna chhangin Home Minister chuan, "Harsatna tâwk an awm lo," tiin a chháng bawk.