Police-te airport phiah faitir Home Minister-in hriatpui lo

Nimin Assembly session-ah ZPM Legis­lature Party (ZLP) leader Lalduhoma chuan Leng­pui Airport phiat fai tura police-te tirh an nih thu a sawi a; Home minister Lalchamliana chuan, police-te airport phiah faitir an ni chu minister a nihna angin a hriatpui loh thu a sawi thung.

Lalduhoma chuan, February 25, Inrinni khan 5th IR aṭangin police 50 chu Lengpui Airport phiat fai tura tirh an nih thu sawiin, "Kan police-te zahlohnaah kan ngai. Hetiang hi Mizoramah kan hre ngai lo a, state dangah pawh kan hre ngai lo. A hma lawkin a ṭawp lutuk a, Salvation an hnatlang tawh. A tibawlhhlawhtu thlentir mai tur a ni a, a nih loh pawhin hlawhfa lâk mai tur. Hetianga police-te chhawr hi a dik dawn em ni?" a ti.

Home Minister chuan, Lengpui Airport tifaia police-te hnatlantir tih chu a dik tih sawiin, "G20 meeting thleng turin India sorkarin min rawn ruat a, kan duh thua sáwm pawh an ni lo. Kawng engkimah inpeih ṭhat a ngai a, lan mawi vete kan duh si. Salvation hote ṭhahnemngaiin an hnatlang tawh a, thawktu pawhin an phâk tâwka tihfai hna an thawk," a ti a, duhthu a la sam loh avangin an sipai zinga mi 50 sorkarin kaichhan a lâk thu a sawi.

Lalchamliana chuan, police-te'n Lengpui Airport an tifai tih chu minister angin a hriatpui loh thu a sawi a, "G20 Committee-in sáwm ang an tih anga an sàwm niin ka hria," a ti.