SEDP vaimim chíngtute'n metric ton 19,084 an thar

Agriculture minister C Lalrinsanga chuan, SEDP hnuaia vaimim chìntir aṭangin vaimim metric ton 19,084 thar a nih thu ZPM member Lalduhoma zawhna chhangin nimin khan House a hrilh.

C Lalrinsanga chuan, vaimim tharte chu sorkarin a theih ang anga a lei thu sawiin, "Sorkarin quintal 1,094.61 a leisak. Serchhipah kg. khat Rs 20-in qtl. 553.19 leisak a ni a, Tanhril hmunah kg. khat Rs 24-in qtl. 541.42 leisak a ni thung," a ti a; sorkarin vaimim a leite chu ran chaw siamna atan hman a nih thu a sawi.

Vaimim chi man a to thu sawiin Lalduhoma chuan, "A hlâwk lutuk lo niin a lang. Support price-te nena ṭan loh chuan a chíngtute tan a hlâwk tak tak lo," a ti a; sorkarin support price a pek theih dan a awm leh awm lo a zawt.

Agriculture Minister chuan, support price a awm theihna atan sorkar laipuiah an thlen thu sawiin, "A procedure (kalphung)-ah buaithlak deuh a awm. Thar tam deuh ni se, support price chu a awm theiin ka ring," a ti.