March 2023 chhungin Mizoram Law College sak zawh Student Bar Council-in an phût

Mizoram Law College-a Student Bar Council hruaitute chuan nimin khan Aizawl Press Club-ah thuthar thehdarhtute an kâwm a; RUSA 2.0 hnuaia an college building sak chu March 2023 chhunga zawh a nih loh chuan law court-ah dan anga hmalak an tum thu an puang.

Student Bar Council (SBC) vice chairman SB Ngoliankima chuan, RUSA 2.0-a Infrastructure Grants to Colleges hnuaiah Law College sakna atan Rs 1,70,00,000 hmuh a nih thu leh, Sky Ridge Construction & Consultancy Services, Aizawl (Benjamin L Tochhong) hnena contract hna pek dan leh hna an thawh danah thil dik tâwk lo leh felhlel a tam hlea an hriat thu a sawi.

College building sakna tura work order chu May 4, 2020-ah tihchhuah a nih thu leh January 4, 2022-ah sak zawh tur a nih laiin, tun thlenga sak zawh a la ni lo tih sawiin SB Ngoliankama chuan, "A hun takah ṭha taka sak zawh a nih theih nan vawi tam tak contractor leh RUSA aṭanga hna viltu engineer leh Higher & Technical Education Minister hnenah pawh kan lo thlen tawh ṭhin a, ngaihsak kan hlawh lo," a ti.

SBC Vice Chairman sawi danin, sorkar leh contractor inremna (Deed of Agreement) ang chuan, Law College chu January 2022-ah sak zawh tur a ni a, sak zawh hun tur aṭanga thla 12 chuang a ral hnuah pawh 40% chauh la thawh zawh a ni. Chutih laiin, RUSA aṭangin Rs 1,17,96,000 pek chhuah a ni tawh thung. Hnathawh zawh tawh zat hi HTE department-in February 22, 2023-a Assembly session zawhna an chhan dan a ni.

Mizoram Law College SBC hruaitute chuan, December 29, 2022-a State Project Directorate (RUSA) ṭhutkhawmah contractor-in chhuanlam beitham tak a siam thu sawiin, "Contractor hian chhuanlamah a hnuaia thawkte nen inhmuh thiam lohna an neih thu a sawi a, sub-contractor-te'n bill an lâk theih loh thu an sawi bawk," an ti a; chuti chunga March 2023 thleng hun pawhsei chu hriatthiam har an tih thu an sawi.

Inremna ang chuan, in sakna atana hman tur cement chu a ṭhat tâwk leh ṭhat tâwk loh Mizoram PWD laboratory-ah emaw, Mizoram University-a Quality Control/Department of Civil Engineering Laboratory-ah emaw thla thum danah endiktir tur a ni a, mahse, vawi khat mah endiktir a ni lo tih a hmuna an enfiahna-ah an finfiah thu an sawi bawk.