CYLA, LSA leh LWA-te'n ngaihdam dil turin DCMA minister R Lalzirliana an phût

Central Young Lai Association (CYLA), Lai Students' Association (LSA) Gen.Hqrs leh Lai Women Association-te chuan District Council & Minority Affairs minister R Lalzirliana chu Assembly House-a a thusawi avangin ngaihdam dil turin an phût.

DMCA minister R Lalzirliana hian February 23, 2023 khan Assembly budget session-ah, "Lém kan va der mai mai a nih kha saw lamah khan, Congress-ah khan vote zawn nan kan va hmang mai mai a nih kha, an ni ho hian an lo awih ve em em a, kha chauh kha a ni, a ho tak tak a ni,” tiin a sawi a; hei hi CYLA leh LSA-te chuan demin, ngaihdam dil turin an phût a ni.

CYLA chuan, R Lalzirliana thusawi chuan autonomous district council (ADC) huam chhunga chêngte rilru a tina hle nia sawiin, "DCMA changtu Minister berin hetianga ADC area-a chêng mipuite hmusit leh thamlo taka min ṭawng khum ta mai hi pawi kan ti tak zet a ni," an ti a; hnam bil inhmuhsitna leh ADC huam chhunga chêngte thamlohna lian taka an ngaih thu an tarlang.

CYLA hian DCMA minister R Lalzirliana chu Assembly House-ah ngei ADC mipui hnenah ngaihdam dil turin an phût a; R Lalzirliana’n DCMA a enkawl chhunzawm chu ADC mipui tan a him tâwk loah ngaiin, DCMA enkawltir tawh lo turin Chief Minister an ngen bawk.

An ngenna chu a hlawhtlin theih nan leh ADC-a chêng mipui hmasawn nan hma an lak zel dawn thu sawiin CYLA chuan, "Kan duhna leh ngennate hi a hlawhtlin loh chuan a tàwp thlengin tun aia ná hian CYLA chuan hma a la chhunzawm zel ang," an ti.

LSA Gen.Hqrs pawhin thuchhuah siamin, R Lalzirliana chu ngaihdam dil turin an phût a; ngaihdam a dil lo a nih chuan Lawngtlai district leilung rap tawh lo turin an ngen. 

R Lalzirliana'n a enkawl DCMA a hre chiang lo hle tih sawiin LSA chuan, "Assembly House-a dâwt a sawi ta mai hi a pawi kan tiin kan dem tak zet," an ti a; ADC area mipui zahlo tak leh hmusit taka Assembly House-ah a sawi avangin Assembly House-ah vêk ngaihdam dilna emaw, thupha chawina emaw sawi turin an phût a, "Kan duhnate hi min tihhlawhtlinsak thei lo a nih chuan Pu R Lalzirliana hian sorkar thilah emaw, election campaign emaw, eng thilah pawh Lawngtlai district leilung lo rap tawh lo turin kan ngen a ni," an ti.

LSA chuan, R Lalzirliana'n 125th Indian Constitution Amendment (Sixth Schedule) chungchangah Parliamentary Standing Committee-in Mizoram sorkar a ràwn angin Mizoram sorkarin comment a pek dan hre veka a insawi leh Guwahati-a meeting-ah pawh tel ve anga a insawi chu a dik loh thu an tarlang a; Guwahati-a meeting-ah LSA hruaitute an tel a, R Lalzirliana erawh chu a tel an hriat loh thu an tarlang a ni.