KHAWTHLIR
MZP-in ngen
MZP Gen. Hqrs hruaitute chuan nimin khan Power and Electricity engineer-in-chief Lalhmingliani Hmar chu a pisaah an hmu a, HSLC leh HSSLC exam chhungin kawlphetha a khaihlak loh nan hma la turin an ngen. Lalhmingliani Hmar chuan, exam chhungin kawlphetha khaihlak awm lo tura theihtawp an chhuah tur thu a sawi.
Training tur thlah
College of Horticulture, Thenzawla B.Sc (Horticulture) final year zirlai ti ṭha pahnih chuan thla khat chhung Thailand ramah training an nei dawn a, nimin khan chhuakin, dean Dr Shri Dhar-a'n a vailiam. Training turte hi Horticulture College-a topper Nyari Taku, Arunachal Pradesh leh pahnihna Lijanbeni Ovung, Nagaland-te an ni a, Queen Siri-kit Botanic Garden, Chiangmai, Thailand-a Workshop on Entrepreneurship opportunities in Agriculture and Related Aspects-ah an tel dawn a ni.
Thlawhtir khap
Aizawl DC Dr Lalhriatzuali Ralte chuan, March 1-3 inkara G-20 meeting leh Chapchar Kût chhungin MZU-a Auditorium leh Multipurpose leh, Lammual chungah phalna nei loa remote control hmang drone/aerial camera thlawhtir khap a nih thu a tarlang.
Lo hâl khap rih
EFCC department chuan, Aizawlah G-20 meeting nghah a nih dawn avangin Aizawl leh a chhehvel khua - Hmunpui, Lengpui, Sairang, Sairang Dinthar, West Serzawl, Lengte leh Nghalchawmah March 4, 2023 ral hmain lo, huan leh leipui hâl khap rih a nih thu a tarlang.
Zirlai vailiam
Governor Dr Hari Babu Kambhampati chuan nimin zing khan Raj Bhavan-ah EBSB North East Yuva Sangam-a tel tur NIT Mizoram leh Aizawl North College zirlai 25 leh zirtirtu palite a vailiam. Exchange prog.-ah hian tourism, tradition, development, people-to-people connect chungchang sawihona neih a ni ang.
Fimkhur turin chah
Aizawl DC Dr Lalhriatzuali Ralte chuan, Augmentation of Water Supply & Construction of 37MLD Water Treatment Plant atana Tlawng luia hna thawh mekah, leivûng hmanga tui khuah chu sah huk thei a nih avangin Tlawng luia balu la ṭhinte leh thil danga kal ṭhinte fimkhur turin a hriattir.
Ráltlân mi 541
Lawngtlai DC conference hall-ah nimin khan sorkar hotute'n Bangladesh aṭanga râltlân Mizorama lutte chhawmdawl leh enkawl dan tur an sawiho. February 17, 2023 thleng khan Lawngtlai district-a khaw pariata ráltlân camp-ah Bangladesh ráltlân mi 541 an awm mek thu tarlan a ni.
Kawng khâr dawn
Vawiin aṭanga March 10, 2023 thlengin zing dar 9:30 leh tlai dar 4:30 inkarah PWD-in Electric Veng thlànmual aṭanga Ramhlun Sport Complex kawng péng inkar an thawm ṭha dawn a, hei vang hian kawngpui hi khâr a ni dawn.
Kawng laih tum lo
Agriculture minister C Lalrinsanga chuan MNF member Lalrintluanga Sailo zawhna chhángin, agriculture link road laihna atan tun dinhmunah fund (sum) a awm loh avangin laih tumna a awm rih loh thu nimin khan House a hrilh.