Tribal Affairs Minister-in hostel a hawng

Sorkar laipuia Tribal Affairs minister of state Renuka Singh Saruta chu nimin khan Lungleiah a zin a, Special Central Assistance to Tribal Sub Scheme kaltlanga Lunglawn, Lungleia Mara Tribal Girls’ Hostel sak thar a hawng. Hostel hi Phako Builders, Khatla-in cheng nuai 210 hmanga an sak a ni.

Renuka Singh Saruta-i chuan, Mizoramin kawlphethaah emaw, tui thianghlim lamah emaw mamawh leh harsatna an neih chuan a hnenah thlen turin mipui a chah a, "A ṭul ang zelin Prime Minister hnenah thlenpui che u ka tum ang," a ti.

Mizoram chu ziak leh chhiar thiam ram a nih angin hmeichhiate dinhmun pawh a ṭhat thu sawiin Renuka Singh Saruta chuan, "A ṭul ang zelin hmeichhe hostel dang pawh ngaihtuah belh a ni ang. Hmeichhiate'n thiamna lamah nasa zawka hma an sawn ka duh," a ti a; hmeichhiate dikna leh chanvo hriat a ṭul thu te, ram hruainaah pawh hmeichhiate'n chanvo nei tura ṭan an lak a pawimawh thute a sawi.

Union Minister chuan, mipui hmasawnna turin scheme hrang hrang sorkar laipui aṭangin siam ṭhin a nih thu te, scheme thil tum leh awmzia hre chiang lo mi tam tak an awm ṭhin thu leh mipuiin an hriat chiana hman ṭangkai a nih theih nan theihtawpa ṭan lak a ṭul thute a sawi bawk.

Minister Renuka Singh Saruta hian Lungleia sorkar hotute leh tlawmngai pawl hruaitute pawh a kâwm a ni.