CEM-in minister Zira thusawi mak a ti

Mara Autonomous District Council-a chief executive member M Laikaw chuan, District Council & Minority Affairs (DCMA) minister R Lalzirliana'n autonomous district council a hre chiang lo leh ADC mipui hmusit taka thu a sawi chu mak a tih thu a sawi a; ADC area aṭangin BJP-in MLA paruk neih an tum thu a sawi bawk.

Aizawla BJP, Mizoram Pradesh pisa, Mipui Rûna nimina inkhawmah thu sawiin M Laikaw chuan, "Minority Affairs changtu Minister-in ADC chungchang a hre chiang lo hi a mak hle a, minority chungchang hmusit tak leh zahpah nei miah loa a sawi hi a mak hle a ni," a ti.

M Laikaw chuan, "ADC nei dang Assam, Tripura leh Meghalaya-te chuan 6th Schedule Amendment chungchangah ṭha taka comment an pek laia CM Pu Zoramthanga'n negative comment a pe hi a mak kan ti a, ADC-te min rahbeh an tum a ni tih a chiang hle," a ti a; MADC, LADC leh CADC-ah chuan ADC hre lo leh hnam tlem zawk hmusittute chu mipuiin an hnâwl vek tawh a rinawm thu a sawi.

MADC CEM chuan, BJP chu hnam tlem zawkte ngai pawimawhtu a nia sawiin, "MLA General Election awm turah pawh ADC pathum - MADC, LADC leh CADC-ah chuan BJP-in MLA paruk kan neih ngei ka ring," a ti a; Siaha district bika Assembly bial pahnih chu BJP-in an lak ve ve dawn thu a sawi bawk.