Mi tlemtê hamṭhatna hi thlâk a ngai - ZPM Vice President

ZPM vice president Rev.Dr K Thanzauva chuan nimin khan an party pisaa inkhawmah thu sawiin, Mizorama mi tlemtê hamṭhatna chu mi tinte intluktlânna vantlang nuna thlâk a ṭul thu leh ram hruaitu atan mihring rilru ṭha leh mawi neih a ngaih thu a sawi.

Rev. Dr K Thanzauva chuan, Pathian ram politics hmathlir ṭha tak neih a ṭul thu sawiin, "Tuna kan society kalphung, mi tlemtê hamṭhatna hi mi tinte intluktlanna vantlang nunin thlâk kan tum tur a ni. Chutiang tur chuan system dik a ṭul a, a kengkawhtu leh hmangtu mihring dik a ngai a, fel leh taimâk a ngai. Mi ṭha kan nih a ṭul a, ram hruaitu atan mihring rilru ṭha leh mawi kan nei ngei tur a ni,” a ti.

Pathian ram politics sawifiahin K Thanzauva chuan, "Pathian ram politics chu retheite lama ṭan hi a ni a, dikna tung ding tura beih hi a ni. Chu chu Lal Isua political manifesto, Nazareth-a puan chhuah leh a mission pumpuiah a lang chiang. Kan ramah mi tam tak retheihna khurah an lut a, mi tam tak chu hmân aṭanga vawiin thlengin an la rethei reng," a ti a; ZPM chu mi retheite lamah an ṭan a, an chhanchhuah a ngaih thu a sawi.

ZPM Vice President chuan, mimalin hmun eng emaw zatah ram zau tak tak an neih ṭhin chu tihtawp a ṭul thu sawiin, "Hmasawnna hnathawh leh dan hmanga rorelnaa dik a ṭul a, corruption hi hnawhchhuah a ṭul bawk," a ti a; kalphung a dik a, mihring an dik chuan mipui dam tlànna khawtlang siam theih a nih thu a sawi bawk.