Study tour-a kal tur ICFAI zirlaite thlah

MJA president C Lalrambuatsaiha chuan nimin khan ICFAI University, Mizorama Department of Management & Information Technology zirlai Industrial Study Tour-a kal turte a thlah liam.

ICFAI University zirlai Industrial Study Tour-a kalte hi zirlai 25 an ni a, zirtirtu pahnihin an hruai a, March 5, 2023-ah Mizoramah an rawn lêt ang. An zin chhungin Guwahati leh a chhehvela Blueberry Amul industry, Vantage Circle, Assam Startup - The Nest leh NEDFI hmunte tlawhin an zir chiang dawn a ni.

Industrial Study Tour-a kal turte thlahna inkhawm hi YMA, Ṭhuampui Branch Committee Room-ah buatsaih a ni a; MJA President chuan, zirlaite chu hnam dang zingah hun eng emaw ti chhung an khawsak dawn avangin Kristian nula tlangval an nih angin mawi taka awm a, Isua Krista ringtu ni àwm rênga khawsa turin a fuih.

C Lalrambuatsaiha chuan, zirlaite chu an kalna apiangah hriat belh neih tum tura chahin, "Industry hrang hrang in tlawhnaah zir chhuah neih ngei in tum tur a ni a, zawhna ngah ula, zawhna in ngah poh leh in hriatna a pung ang. Mizoram tan thil ṭha rawn puak chhuah tum ula, lehkhathiam kan nihna hi chhawr tlâk a nih theih nan inzir chhuah tum ang che u," a ti.