Mizoram siamṭhat hi kan thei reng - Lalsawta

All India Congress Committee (AICC) 85th Session, Chhattisgarh-a tel MPCC hruaitute chu nimin khan an lo haw a; anmahni lo hmuaktute hmaah MPCC president Lalsawta chuan, "Mizoram siamṭhat hi kan thei rengin ka hria," a ti.

Lalsawta chuan, Mizoram siamṭha turin theihtawp chhuah an tum tih sawiin, "Hmun danga kal hian rualawh a na ṭhin. Mizoram siamṭhat hi kan thei rengin kan hre si a, chuvang chuan rualawtin kan lo haw. Inthlan kum a ni a, theihtawpin kan han ti ang," a ti a, ram siam turin thil harsa a awm loh thu a sawi.

Ram siamṭha turin mihringte ngaihtuahna tihdanglam a pawimawh ber tih sawiin Lalsawta chuan, "Tuna kan kalphung anga pawisa nei tam tam vang ringawta inthlannaah pawh tling tura kan hisàp a, nei ve lote tling loa kan inhre sa ngawt ang chi hian min tithlaphang ṭhin. Mipui ngaihtuah dan kan tihdanglam chuan hausa leh neinung ringawtte ram hruaitu atana dahna rilru siam danglam theih a nih ka beisei," a ti.

Congress President chuan, "Huai takin min puitu tur a phêna awm hi an ṭha êm a, kan sorkar ngei theihna turin theihtawp kan chhuah dawn a ni," a ti bawk.