Eptu MLA-te kan bawh bet zel - Lalrintluanga Sailo

MNF party chuan nimin khan Mizo Hnam Rûnah chhung inkhawm an nei a, MNF adviser Lalrintluanga Sailo, MLA chuan, Assembly session neih mekah MNF MLA-te'n eptu MLA-te an bawh bet zel niin a sawi.

Lalrintluanga Sailo chuan, "Session kal mekah MNF legislator-te'n theihtawp chhuaha lungrual taka kan beihna azarah opposition lam kan bawh bet zel a, opposition lamte'n min beihna tur an hre mang lo. Dâwt ngialngan leh thu belhchian dâwl lo hmanga min beihnate chu a dik lohzia hâi lan zel a ni," a ti.

Thusawitu dang MNF adviser C Lalrammawia, ZOHANDCO chairman chuan, "Kan hnam din chhuahna atan MNF hian kawng dik a zawh char char a, kaiṭên lam hawia pheikhai rual taka ke kan chheh zel chuan MNF bawk kan sorkar leh ngei dawn a ni," a ti a; arsi leh kutphahin mawhphurhna an nei a, lukhumin mawhphurhna a nei ve lo niin a sawi.

C Lalrammawia chuan, Zoramthanga'n economic movement a kalpui nia sawiin, "Mi inzir peih mi a nih avangin sum enkawl kawngah pawh sawiselna a awm lo. Mau/rua pawh kan hlawhtlinpui ngei dawn a ni," a ti a; Congress party chu tho chhuak leh mai lo tur an nih avangin huphurh tham an nih loh thu leh ZPM chu anmahni chhungkuaah inbeihna a nasat thu a sawi bawk.