ACB kutphuar MNF-in a phelh - MNYF

Mizo National Youth Front (MNYF) chuan thuchhuah siamin, Congress sorkarin Anti Corruption Bureau (ACB) kut an phuar sak chu MNF sorkarin a phelh niin an tarlang.

Congress ṭhalaite'n thuchhuah an siamah Lok Ayukta-a an lehkha thehluh aṭanga thla 8 ral hnuah pawh thawm awm lova a la reh vung vung mai' niin ACB chu an puhmawh tih tarlangin MNYF chuan, "Chu mai pawh duhtawk loin 'ramhnuai ze ṭha lo chhawm nung zel lo a..' tia mawi lo tak maia thuchhuah an siam ta mai hi mak kan ti hle. Dawt chiang tak mai leh titinaa sawi awm tawk lek thu hmanga kum bul an han ṭan nghal pang mai hi, lainatawm kan ti takzet a ni," an ti.

MNYF tarlan danin, April, 2019-a Congress ṭhalaiin CM office leh Lok Ayukta-a lehkha an thehluh hnu khan Lok Ayukta chuan ACB hnenah chhui turin a pe a, Chief Minister department chan Vigilance Committee pawhin ACB hnenah ni 16.5.2019 khan lehkha an kaltir nghal. Chumi hnu rei lo teah ACB hian chhui zoin Krismas hma khan Lok Ayukta-ah report an thehlut diam tawh a, Lok Ayukta hian hriat belh duh an neih avangin ACB chuan report buatsaih lehin, Krismas-in a nan zui avangin Lok Ayukta-ah thehluh hman a ni ta loa, tunah hian an report kimchang tak thehlut turin an inbuatsaih mek a ni.